Pingasunngornermi ulloq 27. septembari Kommuneqarfik Sermersooq Nuummut innuttaasunik nutaanik nuannersumik paasissutissiinertalimmillu aaqqissuussaqarpoq.
Peqataasut bussinik Nuummi aqqusinernik kaajallaasinneqarput, illoqarfimmik oqaluttuassartaanillu paasissutissinneqarlutik. Kaajallaasitsineq Nuup Saavani naammassineqarpoq – Nuutoqqap katersugaasiviani nal. 18.30, tassani naapinneqarluni borgmesteri Avaaraq Olsen. Tamaani kulturimut tunngasunittaaq ilisarititsisoqarpoq annikitsumillu tamussigassiisoqarluni, illoqarfimmi innuttaasut nutaat najukkami illinnartunik tamulugassinneqarlutik.
Borgmesterip innuttaasunngortut nuannaarluni tikilluaqquai. ”Kommuneqarfik Sermersuumut innuttaasut nuuttut pitsaasumik akuutinneqarnissaat qulakkeerumallugu politikkikkut pingaartinneqarpoq. Taamaattumik aaqqissuussaq manna sivisuumik qilanaarinikuuara kulturikkut paarlaateqatigiinneq sikkerarluaqqullugu. Neriuutigaara nuuttorpassuit illoqarfimmik sungiussilluarumaartut illoqarfimmilu periarfissarpassuit illoqarfissuaaqqatta Nuup tunniussinnaasai atorluarumaaraat,” borgmesteri Avaaraq Olsen oqarpoq.
Aaqqissuussaq iluatsilluarpoq inuillu tikerlaat illoqarfiup oqaluttuassartaanik paasisaqarluarput. ”Illoqarfiup ilisimasaqarfiginissaanut, inunnik nutaanik naapitsinissamut minnerunngitsumillu illoqarfiup oqaluttuassartaanik paasisaqarnissamut pitsaalluinnartuuvoq. Aammattaaq kalaalimerngit immikkuullarissumik sassaalliusiat ooqattaassallugit nuannerluinnarpoq,” Martin Eskildsen oqarpoq.
Nassuiaasoqarluni illoqarfimmik kaajallaasitsinerup saniatigut peqataasut paasissutissatut atortussaminernik tunineqarput, taamaalillutik namminneerlutik Nuummi takusassarpassuit kulturimut tunngassutillit takuniartarsinnaammatigit.
