Sermersuumi sinerissap qanittuani aalisarnermut piniarnermullu siunnersuisooqatigiivi septembarip 20-anni 21-annilu aalisarnermik inuussutissarsiuteqartunut isumasioqatigiisitsipput, Nuup kangerluini aalisarnermut politikkianut nutarsaanissamut siunnersuutinik saqqummiussuillutik.
Aalisarnermik inuussutissarsiutillit aammalu peqatigiiffiit Nuummeersut Qeqertarsuatsiaaneersullu isumasioqatigiinnermi aalisarnermik inuussutissarsiuteqartunut pitsanngorsaataasinnaasunik oqallillutillu siunnersuuteqarput.
Nuup kangerluisa aalisarnermi ileqqoreqqusaliorfigineqarnissaat, nunaminertanik aalisartunut atugassanngortitsisarnerup pitsaanerulernissaa, sulliveqarnikkut aamma neqitsersuisarnikkut atugarineqartut pitsaanerulersinneqarnissaat, saarullinnik uumasuusivitsigut tunisisarnerup pitsaanerusumik aaqqissuussiffigineqarnissaa, Nuummi kalaaliaraq, minnerunngitsumillu aalisarnerup inuussutissarsiutigineqarnerata ingerlanneqartuarnissaa pilerinartunngortinniarlugu inuusuttuaqqanik ilinniartitsisoqartalernissaa isumasioqatigiittut kommunalbestyrelsip suliassaatut innersuussutaasa ilagaat.
Isumasioqatigiinnermi peqataasut
Isumasioqatigiinnermi peqataasut tassaapput Nuummi Qeqertarsuatsiaanilu aalisartut piniartullu peqatigiiffiinit, NAPP-imit, Neqitamit, QAK-imit, QAPP 1953-imit kiisalu KNAPK-imit. Royal Greenland, Polar Seafoodilu aamma peqataatitaqarput kiisalu Aalisarnermut Naalakkersuisoq siunnersuisarfillu Aapisi peqataapput. Siunnersuisooqatigiinnilu politikkeritut ilaasortat Juaaka Lyberth (IA, siunnersuisoqatigiinni siulittaasoq) aamma Peter Davidsen (S, siulittaasup tullia), atorfilittallu.
Borgmesteri Avaaraq Olsenip nuannaarutigaa isumasioqatigiinnermi peqataasorpassuaqarnera kiisalu pitsaasunik siunnersuuteqartoqarnera: “Soqutigissallit amerlasuut isumasioqatigiinnermi peqataanerisa uppernarsarpaa nalunngeriikkatsitut inuussutissarsiummut annertuumik piumassuseqarluartoqarnera. Kommune piniarnermut aalisarnermut tunngasumik immikkut sulialimmik immikkoortortaqarfeqarpoq, immikkoortoqarfimmilu suliassaat ilagaat nutaamik aalisarsarnermut politikkiliornissaq. Peqatigiiffiit, kattuffiit, suliffeqarfiit namminersortullu susassaqartut arlallit siunnersuuteqarnermikkut politikkiliornissatsinnut aallartisaalluarput aammattaaq qanoq allatigut ikiorsersinnaanerlugit paasisaqarfiginnilluarlersilluta”
Piumassuseqarluartumik paaseqatigiittumillu isumasioqatigiinneq
Ulluni marlunni isumasioqatigiittoqarnerani ulloq siulleq aalisarnermut tunngasunik saqqummiussuisoqarlunilu oqallittoqarpoq, ullup aappaani eqimattakkuutaarluni sulisoqareermat kommunalbestyrelsimut suliassatut kaammattuutit innersuussutillu saqqummiussuunneqarput. Innersuussutillu tamakku Sermersuumi aalisarnermut piniarnermullu siunnersuisoqatigiinni pingaarnersiorneqarlutillu tulleriiaarneqassapput, kommunimi suliap ingerlateqqinneqannginnerini.
Siunnersuisoqatigiit siulittaasuat Juaaka Lyberth (IA) ima oqaaseqarpoq: “ Nuannaarutigilluinnarpara innersuussutit ersarissut Siunnersuisoqatigiinnut apuunneqarmata. Isumasioqatigiinneq nuannerpoq ilaatigut oqallinneq pikkunavissortarluni. Oqariartuulli ersarisoq tassa imaani aalisarnerup nunamilu periarfissat pitsangorsaaffigineqartariaqarinerinik oqariartuut. Peqataasut tamarmik piumassuseqarluinnarlutik suleqatigiikkusunnermillu ersersitsillutik peqataanerat assut qujanarlunilu nuannerpoq. Innersuussutigineqartut uagut politikkeritut suleriaqqinnissatsinni toqqammavissaraavut. Qujavunga aalisartut peqatigiiffitik aqqutigalugit Nuummi aalisarnikkut politikkip nutarterneqarnissaanut immersueqataalluarmata”
Sermersuumi sinerissap qanittuani aalisarnermut piniarnermullu siunnersuisoqatigiit kommunalbestyrelsimi ilaasortanit pingasunit kiisalu Sermersuumi inoqarfinnit tamanit piniarnermut aalisarnermullu peqatigiiffiiniit ilaasortaqarpoq.
Siunnersuisoqatigiit siulittaasuata tullia Peter Davidsen (S) aammattaaq isumasioqatigiinnermi peqataasoq ima oqaaseqarpoq: ” Isumasioqatigiinnermi maluginiarpara aalisarnerup iluani “unammillernartut” peqataasunit suleriaqqinnissami naaperiuteqarnissaq, siunertaqarlunilu suleriaqqinnissaq, ujartorneqartoq ornigineqarlunilu.”
