Inuiaqatigiinnut inuunitsinnullu illuliortaatsip isumaa qitiutillugu illuliortaatsimut ullorititami ukiut tamaasa sammineqartarpoq. Ulloq taanna oktobarimi ataasinngornermi siullermi malunnartinneqartarpoq, tassungalu atatillugu Kommuneqarfik Sermersooq ukioq manna saqqummersitsissaaq, Nuummi Illuliortaaseq pillugu pisuttuarneq/Nuuk Arkitektur Walk.
Quppersakkami saqqummiunneqartut tassaallutik immikkut ittumik illuliat 17-it, taakkununnga ilaallutik Hans Egede-p illuaniit, tassa illuni pisoqaanerpaamiit nutaaliaanerusumut soorlu Tusass-ip illorsua. Taakku pilersaarusiaasut peqateqarluni pisuttuarfissatut innersuussaasoq malillugu ornissinnaavatit, immikkulluunniit tamaasa ornissinnaallugit.
Quppersagaq Nuummi Illuliortaaseq pillugu pisuttuarneq/Nuuk Arkitektur Walk Innuttaasunut Kiffartuussivimmi, Tupilak Travelimi, Nuutoqaq aamma Nuummi Eqqumiitsulianik Saqqummersitsivimmi pineqarsinnaavoq.
