Kommunalbestyrelse ippassaq Paamiuni ileqquusumik ataatsimiippoq.
Kommunimi qinikkat ataatsimiinnermi qulequttat 36-t suliaraat, ataatsimiinnerlu kommunip allaffiani pivoq.
”Kommunalbestyrelse kommunitsinni tamanut sullissisuuvoq. Taamaattumik uatsinnut pingaaruteqarsimavoq Nuup avataani ataatsimiissinnaanissaq. Politikkeriusugut periarfissat assigiinngitsut aqqutigalugit malinnaasaraluarluta, assersuutigalugu Najukkami ataatsimiititaliat, nunaqarfinni aqutsisut minnerunngitsumillu ingerlatsivigut aqutsigalugit malinnaasaraluarluta pingaaruteqarpoq nammineq isivut atorlugit pissutsit takunissaat. Taamaattumik iluarpoq Paamiunukarsinnaagatta ataatsimiigiarluta”, borgmester Avaaraq Olsen oqarpoq.
Kommunimi qinikkat eqqartugassaani 36-usuni ilaapput Paamiut pillugit 2024-mut Tamakkiisumik pilersaarut kiisalu Paamiut pillugit isumaqatigiissut.
Tamakkiisumik pilersaarut
”Kommunalbestyrelsip kissaatigaa Paamiut pillugu illoqarfimmut periusissiortoqassasoq, tassanilu Paamiut pillugit Tamakkiisumik pilersaarut tassunga ilaasussaavoq. Taamaattumik nuannaarutigaarput innuttaasut Tamakkiisumik pilersaarusiornermut peqataanerminni Paamiut pillugu periusissiornermut sunniuteqaqataammata”, borgmester Avaaraq Olsen unnersiorpoq.
Paamiut pillugit Tamakkiisumik pilersaarut ullumikkut atuuttoq 2023-p naanerani atorunnaartussaavoq, taamaattumillu Sanarfinermut Avatangiisinullu Ingerlatsivik Paamiut pillugit Tamakkiisumik pilersaarummik nutaamik 2024-mit atuutilertussamik suliaqarluni aallartippoq. Suliamut atatillugu martsimi 2023-mi Paamiuni susassaqartunik ataatsimeeqateqartoqarsimavoq, kiisalu innuttaasunik ataatsimiititsisoqarlunilu sammisaqartitsisoqarsimalluni, tassanilu innuttaasut 40-t missaaniittut peqataasimapput.
Kommuni susassaqartunit innuttaasuniillu siunnersuutinik 150-it sinnerlugit tigusaqarsimavoq, taakkunannga 46-t Paamiut pillugit 2024 Tamakkiisumik pilersaarummut tamanut tusarniaassutigalugu nassiunneqaqqammertumut ilanngunneqarsimallutik.
Paamiut pillugit isumaqatigiissut
Paamiut pillugit isumaqatigiissut Kommuneqarfik Sermersuup Kalaallit Nunaanni peqqinnissaqarfiullu akornanni 2019-imi isumaqatigiissutaavoq. Paamiut pillugit isumaqatigiissutip peqqinnissaqarfiup/peqqissaaviup kommunillu/Paamiunilu utoqqaat illuata akornanni piumasaqaatinik pitsanngorsaanissaq qanimullu suleqatigiinnissap qulakkeerneqarnissaat siunertarivaa. Paamiuni utoqqaat illuata nutaap Puilasunnguit pilersinneqarneranut atatillugu suleqatigiinnissamut isumaqatigiissusiortoqarpoq.
Isumaqatigiissusiortoqareernerata kingorna suleqatigiinnerit assigiinngitsut pisimapput, assersuutigalugu ataatsimoorullugu unnuarsiortussanik, sapaatip-akunnerisa naanerini utoqqarnut nerisassanik pajunnermi aammalu ataatsimut eqqiaaneq errorsisarfimmilu sulisoqarnikkut.
”Paamiut pillugit isumaqatigiissutip takutippaa, pisortani suleqatigiilluartoqarsinnaasoq. Taamaaliortoqarnerani sulisunik atorluaasoqarpoq, ingammik illoqarfinni minnerusuni, sulisussarsiornermi unammillernartunik misigisaqarfiusartuni. Tamanna siunissami inerisassavarput”, borgmester Avaaraq Olsen oqarpoq.
Utoqqaat illuannit peqqissaaviup nakorsaasersuisarneranik suliaa aamma tiguneqarpoq. Najugaqartut nakorsaataasa tunniunneqarneranni utoqqaat illuat annerusumik qulakkeerillunilu nakkutiginnissinnaalerpoq aammalu najugaqartut nakorsaataat allanngoraangata sunniutaannik nakkutiginnissinnaalerluni.
Suleqatigiinnermi alloriarnissaq tulleq ilaatigut tassaassaaq ataatsimoorussamik unnuarsiortoqartarnissaa. Ataatsimoorussamik unnuarsiortoqartarnissaata piviusunngornissaanut videokkut nakkutilliisutit oqaloqatigiinnermullu atortut utoqqaat illuanni ikkunneqassapput.
Kommunimi qinikkat ulluni makkunani suliassaaleqinngeqaat. Ippassaq ataatsimiinnissaq sioqqullugu kommunimi qinikkat immikkut sammisaqaqqaarput, ”2024-mut missingersuutit” qulequtaralugu. Ullumikkullu pingasunngornermi aggustip ulluisa 30-anni aalisarnermik inuussutissarsiuteqarnermut tunngasut assigiinngitsut pulaarneqassapput.