Nuup qeqqani atuarfik nutaaq ateqalissaaq “Atuarfik Inussuk”. Atuarfik Samuel Kleinschmidtip aamma Atuarfik Ukaliusap silataanni ullaaq manna 2. klassimiit 10. klassimut atuartut kiisalu ilinniartitsisui aaqqissuussamut aggersagaaneranni atia nutaaq nalunaarutigineqarpoq.
Atermik unammisitsinerup ingerlanneqarnera
Atuarfiup qanoq ateqarnissaanut aalajangerniarneq sivikissimanngilaq maajillu qaammataani aallartinneqarluni, tassani ilaatigut Meeqqanut Atuarfeqarnermullu Ataatsimiititaq atermik unammisitsinermik aallartitsilluni. Atuarfissap qanoq ateqalernissaa pillugu innuttaasut tamarmik siunnersuuteqarnissaminnut periarfissinneqarput tamatumunngalu atatillugu siunnersuutit 228-t tiguneqarput. Siunnersuutit 228-t ataatsimiititanit immikkut pilersinneqartunit marlunnit quliinnanngortinneqarput kingornalu innuttaasut siunnersuuteqaqqinnissaminnut periarfissinneqaqqipput. Atissatut siunnersuutaasut akornanni Kommuneqarfiga aqqutigalugu taasinissamut pilersitsisoqarpoq tassanilu innuttaasut atissatut piukkunnerusartik toqqarsinnaallugu. Siunnersuutit sisamat toqqarneqarnerpaajusut Meeqqanut Atuarfeqarnermullu Ataatsimiititamut innersuussutigineqarput 2023-milu aggustip ulluisa aappaanni atuarfiup atissaa aalajangiunneqarluni – Atuarfik Inussuk.
Atuarfiup nutaamik ateqalernissaanut siunnersuuteqarsimasumut ajugaasimasumullu, Pipaluk Egede Poulsenimut pilluaqqusillutalu qujaffigaarput.
Aqqata toqqarneqarneranut isumaanullu tunngavilersuutaasoq
Taaguut “Inussuk” Kommuneqarfik Sermersuup ilisarnaatigivaattaaq. Aqqata nutaap nalunaarutigineqarnerani Ataatsimiititami siulittaasup Juaaka Lyberthip Siulittaasullu tulliata Poul Petersenip atermik toqqaanerup isumaatalu tunngavilersuutaa ima oqaaseqarfigaat:
“Inussuk ungasissumiit takullugu inuttut isikkoqartarpoq. Inussuit inunnit sananeqartarput, siornatigullu sumunnarfissamut aqqutissamullu najoqqutarineqartarput – taamatuttaaq atuarfik atuartut ineriartornissaannut tapertaaqataassasoq, aqqutissiuillunilu iluaqutaajumaartoq aamma neriuutigaarput.
Inussuk naleqqatut aamma atorneqartarsimavoq – sumiiffiup ilisarnaataatut – ullumikkullu oqaaseq naleraq illunut immikkuullarissunut inussunnulluunniit atorneqartarpoq. Neriuppugut atuarfik una Nuummut aamma ilisarnaataalissasoq. Innuttaasut tamarmik iluaqutigalugu ataatsimoorfigisinnaasaat, taakkumi atuarfiup avataatigut atuarfik atorsinnaassavaat.”
Atuarfik Inussuk pillugu takorluugaq
Meerartatta inuusuttortattalu nunarsuarmiooqataanerulernissaannut inuiaqatigiillu teknologiimik atuisut akornanniinnerulernissaannut piareersarniassagatsigit inuiaqatigiillu taakku ilutigalugit atuarfik atuartitsinerlu taamatut inerisarneqassasoq tunngavigalugu atuarfik pilersinneqarpoq.
Inuusuttut nutaaliorsinnaassusillit, suleqatiginnissinnaassusillit, isorinnillutik eqqarsarsinnaassusillit akimorlugulu pisinnaassusillit inuiaqatigiinnit piumaneqarput. Tassaapput piginnaasat atuarfitta atuartunut ingerlateqqitassai. Taamaattumik atuarfimmi atuartitsissutit qaffassaaffigineqarlutillu tamatuma anguniarnissaanut piumassuseqartoqassasoq pingaartinneqangaarpoq aammali atuartitsinermi ileqqorineqartartut kisiisa pinnagit allatut atuartitsineq periarfissarineqarusulluni. Atuarfik nutaaq pillugu paasissutissat allat atuarsinnaavatit uani.