Eqqumiitsuliortoq Sacha Malinský marsip qaammataanili Kommuneqarfik Sermersooq suleqatigalugu “You matter” suliarilerpaa.
Suliami siunertarineqarpoq eqqumiitsuliaq aqqutigalugu Nuummi meeqqat inuusuttuaqqallu qiimmassarlugit ataatsimoortinnissaat, eqqumiitsuliarlu kommuneqarfiup allaffissuata silataani iigaani ikkunneqarumaarpoq. Innuttaasut qiimmaallaatigisinnaassaannik ilusilersugaq timmissap sulua qalipaatigeqisup saavani assilisissinnaajumaarput.
“Suliaq tassaavoq Nuummi innuttaasunut tamanut, ingammik meeqqanut inuusuttuaqqanullu nersorinnissut. Ilusilersugaq eqqaasitseqataavoq nuannersut innuttut ataasiakkaatut qiimmallaatigisartakkatsinnik, ataatsimoornitsigullu qanoq pilersitsilluarsinnaanitsinnik. Timmissap suluani meqqut takussutissartarivaat Nuummi innuttaasut inuit ataasiakkaat inuiaqatigiinnut pingaaruteqassusaat aammalu naleqassusaat”, Sacha Malinský oqaluttuarpoq.
Suluk ersersinniarlugu Sacha arlaleriarluni Nuummi meeqqanik inuusuttunillu pilersitsiffiusumik sammisaqartitsisarpoq. Pilersitsiffiusumik sammisaqartitsisarnerit tamakku ingerlanneqarput Nuummi Katersugaasivik aamma Katuaq suleqatigalugit. Meeqqat kaammattorneqarput timmissap sulua kusassassagaat namminneq inuttut suut nuannaarutigisarnerlugit oqariartuutigerusutaminnik. Allanneq, titartaaneq timmissallu suluini qalipaasersuineq atorlugit kusanartulianik asseqanngitsunik qalipaatigissunillu pilersitsipput.
“Suliniut assut qiimmaallannaqaaq, qungujularnermik ulikkaartoq, ilaatigullu immikkuullarilluinnaqqissaartumik eqqissisimanertalik. Eqummiitsuliorneq nuannersumik oqariartuutilik tamanut qiimmaallatsitsisinnaavoq ukioqatigiiaanullu tamanut ataatsimoortitsisinnaalluni. Sulinut “You matter” inunnut ataasiakkaanut eqqaasitseqataavoq tamakkiisumi qanoq pingaaruteqartiginerlutik aamma immikkuullaritsiginerlutik”, Sacha Malinský.
Kingornatigut Sacha timmissap meqquisut ittut qisuit kusassakkat 150-inik sinneqartut katiterpai alutornarluinnartumillu suluttut ilusilersukkamik pilersitsilluni. Ilusilersugaq eqqumiitsuliaavoq kusanarluinnartoq, takutinniarneqarluni meqqut amerlasuut katikkaanni kusanartumik alutornarluinnartumillu pilersitsisoqarsinnaasoq. Taamatut ersersitsisoqarneratigut eqqaasinneqarpugut, inuit tamarmik ataasiakkaarlutik ataatsimuussusermut tunniusseqataanermikkut uummaarissumik eqeersimaartumillu pilersitseqataasinnaanerisa pingaaruteqarluinnartuusoq.
Juulip ulluisa 24-anni nal. 16 – 17 takuteqqaarneqassaaq, tassungalu atatillugu Kommuneqarfik Sermersuumiit meeqqat tamarmik angajoqqaatik peqatigalugit peqataajartornissaat kaammattuutigineqarpoq. Malugalugu, ilusilersugaq takuteqqaalinnginnerani uleqartinneqassammat.
Kommuneqarfik Sermersooq ilusilersukkamik takutitsisoqaqqaarnerani innuttaasunik suluit saavani assiliisaqattaarumaarpoq.