Kommuneqarfik Sermersuumit sapaatip-akunnera una umimmaat 30-t Ivittuuniit Paamiunut nooriaraluarneqarput, ajornartoortoqarnerali peqqutigalugu suliniut kinguartinneqartariaqarsimavoq.
Nakorsaatit ilaat atorneqartussaq ajoquteqarsimavoq taamaattumillu umimmammik sinitsitsiniarneq iluatsinngitsoorluni. Peqataasut ilaannaalluunniit umimmammik eqqumasumik nuussiumanngimmata sulisut nuussinissaraluaq taamaatiinnarpaat kingusinnerusukkullu misilinneqaqqissalluni. “Maannakkut iluatsinngitsoornera uggornaqaaq, tunniutiinnanngilagulli”, Susanne Bisgaard Rasmussen suliniummi aqutsisoq oqarpoq. Qaqugu nuussinissamik misiliisoqaqqissanersoq suli aalajangerneqanngilaq. Paamiuni piniarnermut periarfissat annertusiniarlugit umimmaat nuunneqassapput.