Pimmatiginnittarneq akiorniarlugu Nuna tamakkerlugu periusissiap nutaap atuutilersinneqarnissaanut atatillugu kommunimi ulluunerani neqeroorutini aqutsisut tamarmik ullormut immikkut sammisaqarfiusumut Meeqqanut Atuarfeqarnermullu Ingerlatsivimmit aggersarneqarput.
Ullormi immikkut sammisaqarfiusumi siunertaavoq, pimmatiginneriaatsit assigiinngitsut paasisimasaqarfigineqarnerulernissaat kiisalu pimmatiginnittarnerup pitsaaliorneqarnissaanut eqeersimaartumik iliuuseqarfiginninnissamut ataatsimoorussamik oqalliseqatigiinnissaq – ingerlatsivimmi aamma meeqqerivinni.
“Pimmatiginnittarneq unitsissagutsigu, aamma taamaaliussaagut, taava pisariaqarpoq pimmatiginninnerup suunera pillugu ilisimasatsinnik nutarterinissarput, aamma uagut meeqqat akornanni inersimasutut qanoq iliorluta pimmatiginninnermik pinaveersaartitsinissamut akisussaaffeqarnersugut ilisimassallugu. Siusinnerusukkut atuarfinni aqutsisut, klubini aqutsisut allallu ullormik immikkut sammisaqarfimmik ingerlatsiffigaavut. Maannakkut kommunimi ulluunerani neqeroorutit sammisamik ingerlatsiffigissavagut, taamaaliorluta qulakkiissavarput meeqqanik qanimut sullissisut tamarmik anguniakkat assigiit pillugit assigiimmik paasinnittaaseqarnissaat”, ulluunerani neqeroorutinut fagchefi Ane Marie Lynge Møller oqarpoq.
Nangilluni oqarpoq: ”Pimmatiginninneq meeqqat atugarissaarnerannut annertuumik kinguneqarsinnaavoq aamma taamaattumik ilikkagassanik tigooraasinnaanermut ineriartortitsinissaannut periarfissaannut. Taamaattumik pingaaruteqarpoq meeqqat inuuneranni siusissukkut pimmatigineqarsinnaanerannut pinaveersaartitsineq pitsanngorsaaffigigutsigu.”
Ullut immikkut sammisaqarfiusut pimmatiginnittarneq akiorniarlugu sulinerup sakkortusineqarnissaanut aallarniutaasussatut isigineqassapput.
Immikkoortortat tamarmik akornanni ‘pimmatiginnittarnermik paasinneriaaseq’ pillugu assigiimmik isiginnittaaseqarnissaq kissaatigaarput, taamaalillutalu ’meeqqat tungaaniit isigalugu’ paasisaqarfigalugu, tassuunakkullu eqqortumik iliuuseqarfiginninnissamut pisariaqartutigut ilisimasaqalissalluta. Peqataasut peqataarusussuseqaqaat ingerlatsinerullu aallartilluarneqarnera nuannaarutigeqaarput. Malugisinnaavarput sammisaq iliuuseqarusunnermik eqeersaasoq – aqutsisut aamma meeqqat qanillugit sulisut akornanni, Ineriartornermut, Peqqinnermik Siuarsaaneq Pitsaaliuinermullu Immikkoortortami pisortaq, Jill Raarup-Hellesen oqarpoq.
Immikkut ittumik sammisaqarneq Ilinniartitaanermut Aqutsisoqarfik aamma pimmatiginnittarnermik ilisimatusarsimasoq Helle Rabøl suleqatigalugit aaqqissuunneqarpoq, taanna aamma Nuna tamakkerlugu Pimmatiginninneq akiorniarlugu periusissiaq pillugu saqqummiivoq. Nuna tamakkerlugu pimmatiginninneq akiorniarlugu periusissiaq pimmatiginninneq pillugu ilisimatusarnerup iluani nutaanerpaaq aamma Kalaallit Nunaanni meeqqat inuusuttullu akornanni pimmatiginnittarnermik misissuinermik tunngaveqarpoq.
