Ileqqoq malillugu juunip 21-anni Inuiattut ullorsiornitsinni puiseqqaanniuunnissamut peqataanissannut piareersimavit? Gummibådemik aquuteralammillu eqquisinnaavutit.
Inuiattut ullorsiornermi Nuummi ileqqoq malillugu puiseqqaanniuutsitsisoqassaaq. Kikkut tamarmik angallateqartut peqataasinnaapput puisilu sunaluunniit piniarneqarsinnaalluni. Sunngiffimmi piniarnermut allagartaq piumasaqaataavoq.
Nal. 07.50 – peqataasussat piareersassapput
Peqataasussat nalunaarsimasut tamarmik Nuup Saavani katersuutissapput.
Nal. 08.30 – Aallarneq
Naalakkersuisut Artisk Kommando peqatigalu puiseqqaarniuunneq qamutilittarnikkut aallartissavaat. Puiseqqaanniuunneq qamutilittarnerit pingajussaanni aallartissaaq.
Qanoq ajugaasoqassava?
Ajugaasutut nalunaarutigineqartussat tassaapput puisimik pisaqaqqaartut pingasut Nuup Saavanut tikiusseqqaartut. Ajugaasunik suaaruteqartoqannginnerani puisit nutaassussaat misissorneqaqqaassapput, neqiillu puisinit pisarineqartuneersut pisarneq malillugu utoqqaat illuinut tunniunneqarumaarput.
Pinnatassat
Puisimik tikiusseqqaartut pingasut pinnatassaqarput. Ajugaasut pisaqaqqaarsimasutuinnaq pinnatik aamma pinnatassaqarput, tassani ilaatigut gummibådi nutaarsuaq aamma aquuteralak imaluunniit pinnatassat assigiinngitsut (goodiebag) pinnatarineqartussaallutik. Pinnatassat Yama-Tekimiit Nuuk Marine Centerimiillu tunissutigineqarput.
Nalunaarneq
Ukioq manna puiseqqaanniuuttoqarnerani peqataaniaraanni nalunaarsimasariaqarpoq. Peqataasussat nalunaarsimanermut uppernarsaammik pinnassimasut kisimik peqataasinnaallutillu pinnatassanik pissarsisinnaapput. Nalunaarniaruit ima-iliorsinnaavutit:
- Juunip 21-anni ullaakkut kingusinnerpaamik nal. 08.00, Nuup Saavani nalunaarsinnaavutit.
- 52 71 55-imut sianerlutit imal. SMS-ikkut allallutit
- klmm@sermersooq.gl -imut mailimik nassiussigit, uku paasissutissat ilanngullugit:
– Atitit tamaasa
– Inuup normua
– Konto normut
(Paasissutissat kommunimi naatsorsuuserinermi kisimi atorneqassapput, taakku pinnatassanik tunniussilernermi atorneqartussaammat)
Inuiattut ullorsiornitsinni puiseqqaanniuunnissamut peqataanissat qilanaaraarput!