Kommuneqarfik Sermersuumi meeqqanik inissiisarnermut aningaasartuutini missingersuutit qaangerneqaqqipput.
”Kisitsisit kommunip aningaasaqarneranut, pingaartumillu ilaqutariinnut eqqugaasunut alianartunik oqaluttuassartaqarput. Tunngaviusuni pitsaasoq tassaavoq, inuiaqatigiinni meeqqat toqqissisimanissaat annertunerujussuarmik eqqumaffigineqalersimammat. 2021-mi meeqqat toqqissisimanngitsut pillugit 2500-nik nalunaarutisivugut, siornalu 3100-nik nalunaarutisilluta. Tamanna meeqqat amerlanerusut ikiortariaqarnerinut eqqumaffiginninnerulernitsinnik isumaqarpoq”, Kommuneqarfik Sermersuumi borgmesteri Avaaraq Olsen oqarpoq.
Pisariaqartitsineq annertusiartormat borgmesteri isumaqarpoq, Sermersuumi inissiinissanik pinaveersaartitsiniarluni periusissiap atuutsiinnarnissaa pingaaruteqartoq.
Kommuneqarfik Sermersooq ukiuni kingullerni suliniutinik arlalippassuarnik, ilaqutariinnut eqqugaasartunut nammineernerulersitsinermik kinguneqartussanik, taamaalillunilu meeqqat inissinneqarnissaannik pinngitsuuititsisinnaasunik aallartitsisimavoq.
Nuummi Kuserneq naartusunut aammalu ilaqutariinnut mikisunik, 0 – 2-nik ukiulinnik meeralinnut najugaqarfittut katsorsaavittullu neqeroorutaavoq. Katsorsaaneq ilaqutariinnut, meeqqaminnik paarsinissamut ikiorneqarnissamik atorfissaqartitsisunut neqeroorutaavoq. Matumani siusissukkut suliniuteqarnissaq pineqarpoq,katsorsaaneq meeqqap inunngunnginnerani aallartinneqartarmat aammalu meeqqap ukiuini siullerni marlunni ingerlateqqinneqartarluni. Kusernermi angajoqqaat ilaqutariinnut ilitsersuinikkut katsorsarneqarnikkullu ikiorneqartarput, kiisalu imminut paarinissamut meeqqallu paarinissaanut iluaqutaasumik katsorsaaviusarluni.
Ilaqutariit Kusernermi najugallit aqqaniliupput, kisiannili ilaqutariit suli amerlanerusut sullissivik Ivaaq aqqutigalugu assinganik tapersersorneqartarput.
Ivaaq najugaqarfissatut neqeroorutaanngilaq, kisiannili ilaqutariinnut ilitsersuineq, ataasiakkaaraluni oqaloqatiginninneq, aappariinnik oqaloqatiginninneq, naalungiarsunnik katsorsaaneq aammalu ilaqutariinnut inuusuttunut, namminneq angerlarsimaffimminni najugalinnut ilinniartitsineq ingerlanneqartarput.
Tamatuma saniatigut Kommuneqarfik Sermersooq Meeqqanut Ilaqutariinnullu Sullissivik aqqutigalugu ilaqutariinnut arlalippassuarnut, ulluinnarni ilaqutariittorpiaq ingerlanissamut ikiuutaasussanik neqerooruteqarpoq.
”Inissiineq sunaluunniit ilaqutariinnut meeqqamullu alianartuuvoq. Taamaattumik pinaveersaartitsineq pingaaruteqarpoq. Sulisugut suliassaqarfimmi tassani annertuunik suliniuteqartarput. Ajoraluartumik pisariaqartitsinermut suli malinnaasinnaanngilagut, qularinngilaralu pinaveersaartitsilluta suliniutinik ingerlataqanngitsuugutta inissiinerit suli amerlanerussagaluartut.
Ukioq manna Kommuneqarfik Sermersooq ilaqutariinnut atugarliortunut neqeroorummik nutaamik pilersitsissaaq. Neqeroorutip taaguutitaa Papik, tassanilu ilaqutariinni meeqqanik inissiisoqarsimatillugu meeqqap angerlaqqinnissaanut piareersarnermut ilaqutariit ikiorneqartassapput. Kommunimi maannarpiaq iluatsitsisimaarpugut, tassalu meeqqanik isumaginninnerup iluani atorfiit tamarmik inuttaqarput.