Apriilip ulluisa 17-ianni upalungaarsimasut soqutiginnittunik arlalinnik workshoppimut qaaqqusipput. Workshoppi upalungaarsimasunut nutaamik immikkoortumut pilersaarusiornissamut aallartisaalluni suliaqarnermut ilaavoq.
Workshoppip soqutiginnittut akornanni ilisimasanik avitseqatigiiffimmik pilersitsisoqarnissaa pingaarnertut siunertaraa. Matumani Sikuki Harborimit, Kalaallit Nunaanni Politiinit, Arktisk Kommandomit, Mittarfeqarfinnit, Polar Oilimit, Namminersorlutik Oqartussanit kiisalu Kommuneqarfik Sermersuumit sinniisut peqataasuni ilaapput. Upalungaarsimasunit aallaqqaataaniilli paasisassat pisariaqartut tamaasa pissarsiariniarneqarnissaat kissaataavoq.
”Uatsinnut upalungaarsimasuniittunut oqartussaaffeqarfiit suliffeqarfiillu allat nutaamik immikkoortumut pilersaarusiornissamut tunngatillugu isumaannik paasisaqarnissarput pingaaruteqarpoq. Nassuiarluassagaanni, immikkoortumut pilersaarut nutaaq Upalungaarsimasut siunissaannik aalajangeeqataassaaq.” Kommuneqarfik Sermersuumi upalungaarsimasuni pisortaq Jes Damgaard Andersen oqaaseqarpoq.
Oqartussat – matumani Upalungaarsimasut politiillu ilanngullugit – akornanni suleqatigiinneq annermik oqallisigineqarpoq. Oqartussat suleqatigiinnerannut kiisalu ikuallattoqarnerani ataqatigiissaarinermut atatillugu pisinnaasut sulissutigineqarput. Atortulersuutit pisariaqartut soorunami aamma assut oqallisigineqarput, taannami sammisaammat siammasissoq immaqalu peqataasunut tamanut attuumassuteqartoq. Atortulersuutit pisariaqartut tassaapput atortut inuiaqatigiinnut assut sunniuteqartut kiisalu suliffeqarfinnut, oqartussanut innuttaasunullu pingaaruteqaqisut.
Taamaattumik workshoppi Upalungaarsimasut siunissami siammasinnerusumik isiginiarneqartalernissaannut siunissamilu ajornartorsiutaasinnaasunut piareersarnissaannut aallarniutaasutut atuuffeqarpoq Taanna taamaallaat tunngavigalugu peqataasut siammasissumeernissaat ataatsimullu isigalugu paasissutissatigut qaffasissumik pitsaassuseqartumik inissisimanissaat pingaaruteqarsimavoq.
