Nuna tamakkerlugu Pimmatiginninneq akiorniarlugu periusissiap nutaap atuutilersinneqarnissaanut atatillugu atuarfinni, klubbini, atuartut angerlarsimaffiini aqutsisunik, MISI kiisalu AKO-ni FRO-nilu aqutsisunik immikkut sammisaqarluni ulloqarnissamut Meeqqanut Atuarfeqarnermullu Ingerlatsivik aggersaavoq.
Pimmatiginnittarnerup pitsaaliorneqarnissaa Meeqqanut Atuarfeqarnermullu Ingerlatsivimmi annertuumik eqqumaffigineqarpoq, kommunimmi tungaaniit kissaatigineqarpoq, atuartut ingerlalluarnissaannut pitsaanerpaamik sinaakkutissaliortoqassasoq.
”Meeqqat ingerlalluarnissaraluinut annertuumik kinguneqartarnera pillugu pimmatiginnittarnerup pitsaaliorniarneqarnissaanut tunngasumik aallussaqarnissaq pingaaruteqarpoq, taamaaliortoqarneratigummi ilikkagaqarsinnaassusiat annertunerulissaaq”, atuarfeqarnermut fagchefi Riikki Grønvold oqarpoq.
Immikkut ittumik sammisaqartitsineq pimmatiginnittarnermik sukumiisumik pitsaaliuiniarnermut aallartisaanertut isigineqassaaq. Pimmatiginnittarneq pitsaaliorniarlugu iliuuseqarfiginiarlugulu pimmatiginnittarnerup suunera ataatsimoorussamik paasineqartariaqarpoq. Taamaattumik immikkut ittumik sammisaqartitsinermi siunertaavoq, pimmatiginneriaatsit sammivii assigiinngitsut paasisimasaqarfigineqarnerulernissaat kiisalu pimmatiginnittarnerup pitsaaliorneqarnissaanut eqeersimaartumik iliuuseqarfiginninnissamut ataatsimoorussamik oqalliseqatigiinnissaq – ingerlatsivimmi, meeqqerivinni, AKO-ni, atuarfinni, klubbini aamma elevhjemmini. Marsip 9-anni immikkut ittumik sammisaqarneq sioqqullugu aamma atuarfiit, ulluunerani neqeroorutit, MISI kiisalu peqqinnermut pitsaaliuinermullu siunnersortit sinniisuusut suleqatigiissitani ataatsimeeqatigeeqqaarput.
Pimmatiginnittarnermik pitsaaliuiniarneq suliniutinut allarpassuarnut attuumassuteqarpoq, soorlu ilaatigut atuarumajunnaartarnermut, kiserliortarnermut aamma angajoqqaanik suleqateqarnermut. Immikkoortortat tamarmik akornanni ‘pimmatiginnittarnermik paasinneriaaseq’ pillugu assigiimmik isiginnittaaseqarnissaq kissaatigaarput, taamaalillutalu ’meeqqat tungaaniit isigalugu’ paasisaqarfigalugu, tassuunakkullu eqqortumik iliuuseqarfiginninnissamut pisariaqartutigut ilisimasaqalissalluta. Ullumi peqataasut peqataarusussuseqarluarput, suliniuteqarfiginninniarnerullu aallartilluarneqarnera nuannaarutigeqaarput. Malunnarpoq, qulequtarineqartoq iliuuseqarusulersitsisuusoq – tassa aqutsisut, meeqqanik qanimut suliallit akornanni aamma kommunalbestyrelsimut ilaasortanit eqqumaffigineqarluartorujussuuvoq.”, Meeqqanut Atuarfeqarnermullu Ingerlatsivimmi Ineriartortitsinermut pisortaq Jill Raarup-Hellesen oqarpoq.
Immikkut ittumik sammisaqarneq Ilinniartitaanermut Aqutsisoqarfik aamma pimmatiginnittarnermik ilisimatusarsimasoq Helle Rabøl suleqatigalugit aaqqissuunneqarpoq, taanna aamma Nuna tamakkerlugu Pimmatiginninneq akiorniarlugu periusissiaq pillugu saqqummiivoq. Nuna tamakkerlugu pimmatiginninneq akiorniarlugu periusissiaq pimmatiginninneq pillugu ilisimatusarnerup iluani nutaanerpaaq aamma Kalaallit Nunaanni meeqqat inuusuttullu akornanni pimmatiginnittarnermik misissuinermik tunngaveqarpoq.
Ulluunerani neqerooruteqarfinni aqutsisut immikkut ittumik sammisaqartinneqarnissamik assingusumik maajip ulluisa 4-ni 2023 ingerlatsiffigineqassapput.
Immikkut ittumik sammisaqarnermit assit:
