Anorip sakkortussusia sekundimut 40 meterit sinnerlugit sukkassuseqartoq uuttorneqarpoq, taamaattumillu sanaartorfinni sanaartornermut atortut aalajangeqqanngitsut silaannarmi teqqakattarput. Upalungaarsimasut innuttaasunut ajornartooqqasunut ornigunnissaminnut piareeqqapput, apummik anorersuarujussuarmillu ingerlariaqqissinnaanngitsunut. Ornigunnerit tamarmik ajornartorsiutitaqanngitsumik ingerlanneqarput naak anori sakkortuumik anoraasuasaraluarartoq.
Suliat piareersaataasut
DMI-miit Kalaallit Nunaata kangiata kujataata annersaani anorersuarujussuarnissaanik nalunaaruteqartoqarnerata kingornatigut upalungaarsimasut piareersarlutik aallartippput. ”DMI anorersuarujussuarnissaanik aallerisaaruteqaraangat, upalungaarsimanermik suliat aallartinneqartarput. Siullermik oqartussaqarfiit atuumassuteqartut tamaasa attaveqarfiginissai isumagineqartarpoq – Kommunimi aqutsisut ilanngullugit”, Upalungaarsimanermut pisortaq, Jes Damgaard Andersen oqarpoq.
Innuttassut nalinginaasumik sila sakkortooq paasiniassallugu pikkoriffigisarpaat. Taamaakkaluartoq Upalungaarsimasut pingaartillugu qulakkeertussaavaat kommunimi innuttaasut silap sakkortusinnaaneranik paasitissallugit. ”Piffissaagallartillugu innuttaasut ilisimatilluarneqartussaapput, taamaalillutik pisariaqanngitsumik ulorianartorsiortinneqassanngillat. Tamatumunnga atatillugu attaveqaatinut atortut arlallit atortarpagut – Kommunip aamma Politiit facebookikkut nittartagaat ilanngullugit”, Jes Damgaard Andersen oqaaseqarpoq.
Nangippoq: ”Upalungaarsimanermi piareersaataasumik aallartinnermi naak attaveqaqatigiinneq pingaaruteqarluinnartuugaluartoq, saniatigut sulisorineqarsinnaasut inissitsiterlugit piareersartarpagut annaassiniarnissamut piareersimaniarluta.”
Sanaartorfinni stilladsit uppissimasut, aalajangeqqanngitsut biilillu ajutoorsimasut
Anorersuarujussuup Tunup kujataa sakkortuumik eqqorpaa, naak DMI-mit sakkortunerusumik sakkortussuseqarnissaa ilimagineqaraluartoq. Silamiittut aalajangeqqanngitsut amerlasuut, sanaartornermi atortut stilladsillu anorimit teqqakattartinneqarsimapput. Innuttaasut ilaannit allaat anoraasuarsuit pissutigalugit igalaat ilummut milluttarnerat misigisarsimavaat. Allat suliffimminniit angerlarlutik marrittarsimapput taamaattumillu upalungaarsimasuniit ikiorserneqartariaqarlutik.
”Upalungaarsimasuni inuit inuuneri salliuttuaannarpagut, taamaattumillu innuttaasut apummut marrissimasut ornittarpagut. Biilerlutik ajornartoortut qujanartumik annaattarpagut, angerlasimaffiinut apuutinngikkutsigit qatserisartoqarfimmukaattarpagut. Anorersuarujussuarmit silami aalajangeqqanngitsut teqqalatinneqaraangata silamiinnissaq ulorianartarpoq. Taamaattumik silamut aatsaat anisarpugut inunnik ajornartoortoqaraangat. Qujanartumik inunnik ajoqusertoqanngilaq, tamanna innuttaasut oqartussat innersuussutaannik malinnilluarsimanerannik pissuteqarpoq”, Jes Damgaard Andersen oqarpoq.
Upalungaarsimasut biilinut marrittunut 10-t missaanniittunut ornigupput, biilertunut isumannaatsumut pinissaminnut ikiorneqartariaqartunut.
Oqartussaqarfiit innuttaasullu borgmesterimit nersualaarneqarput
Oqartussaqarfiit suliarujussuat arajutsineqarsimanngilaq. Upalungaarsimasut biilerlutik ajornartoorsimasut ikiornerisa saniatigut ataqatigiissaaraluni suliarujussuaq ippinnaateqanngitsumik ingerlavoq. Tassani innuttaasut isersimaannarsimanerat iluaqutaalluni pisooqataavoq.
”Siullermik suliaq najukkami oqartussaqarfinnit isumagineqartoq tulluusimaarutigivara. Anori taama sakkortutigisumik anoraasuartartigisoq arlalinnik ajoqusertoqarsimasinnaagaluarpoq. Taamatut qujanartumik pisoqanngilaq, oqartussaasut annertuumik iliuuseqarnerat innuttaasullu mianersornerat pissutigalugu”, Kommuneqarfik Sermersuumi borgmesteri, Avaaraq S. Olsen, oqarpoq.
Nangilluni oqarpoq: ”Sumiiffimmi oqartussat imminnut ataqatigiissaarinerat taama kusanartigisoq tupinnarpoq – Politiit, Upalungaarsimasut kommunilu ilanngullugit. Pisoq pillugu ingerlaavartumik paasissutissinneqartarpunga suliaasalu ippinnaateqannginnerat paasivara. Atortut ajoqusernerat anorersuarujussuarmik pissuteqartumik qanoq iliorsinnaanngilarput, kisianni inuup inuunera tamanit pingaartinnerpaatissavarput. Taamaattutmik assorsuaq nersualaarillungalu qujarusuppunga, oqartussaqarfinnut tamanut akuusunut kommunimilu innuttaasunut, immitsinnut paarilluarsimanerput pillugu.”