Sermersuumi Nipilersornermik ilinniarfimmi aqutsisoq Pipaluk Lynge Berthelsen februaarip qeqqani Paamiunut tikeraarpoq, Paamiuni meeqqanut inuusuttuaqqanullu nipilersornermik sammisassaqartitsiutigaluni meeqqeriveqarfiit Atuarfik Tuiisarlu suleqatigineri ingerlateqqinneqarnissaanik isumaqatigiissusioriartorluni.
Pipaluk Lynge Berthelsen Paamiuni meeqqanut inuusuttuaqqanullu nipilersornermik sammisaqartitsigami Ellen Jakobsen aamma John Sakæussen suleqatigai. Ullut marluk sammisaqartitsisoqarnerani peqataasut 25-upput.
“Nuannaaqaagut taamak amerlatigisut peqataammata. Kikkut tamarmik tikilluaqqusaasimapput, nalunaaqqaarnissarlu piumasaqaataanani”, Pipaluk oqarpoq.
Ulluni marlunni sammisaqartitsisoqarnerata saniatigut, Paamiuni angalanermi isumaqatigiissutissat isumagineqartussaasimapput. Nipilersornermik ilinniartitsinerit amerlanerusut qulakkeerneqarsimapput, meeqqerivinni nipilersorneq atorlugu sammisaqartitsinerit ullulersorneqarsimapput kiisalu 6. klassinut Meeqqat Ulluat juullillu tungaannut nipilersornermik ilinniartitsinissat qulakkeerneqarlutik.
“Meeqqerivik Mike pulaarparput eqimattallu marluusut immikkut tamarmik minutsinik 25-nik sammisaqartippagut. Tassani meeqqerivimmi aqutsisoq peqataavoq takuniarlugu meeqqanut nipilersornermik siunissani qanoq sammisaqartitsinissamut isumassarsiorniarluni. Rytmelege kiisalu solmisation sammivagut, tassani nipi timilu suleqatigiinnissaat ilinniartinneqarluni”, Pipaluk oqaluttuarpoq.
Assit ataani takusinnaasasi tassaapput meeqqerivimmut pulaarnermi kiisalu Taqqissuummi sammisaqartitsinermi assilineqarsimasut.
