Ukioq manna suliffissaaleqisut ikileqqissimasut suliffissaqartitsinermik suliassaqarfimmi kisitsisit kingulliit takutippaat, tamannalu kommunimut nutaarsiassatsialaavoq. Tassa imaappoq, suliffissaqartitsinermik suliassaqarfimmi kommunip suliniutai iluatsissimapput.
Kommunip nammineq kisitsisaatai tunngavigalugit suliffissaaleqisut ukiup ataasiinnaap ingerlanerani innuttaasunik 87-inik ikilipput. Ersarinnerusumik oqaatigalugu suliffissaaleqisut 2021-p naalernerani 595-ipput. Ukioq ataaseq qaangiummat piffissami tassani kisitsisit 509-nut apparput. Taamatut pitsaasumik nikeriaateqarneq sumiiffinni kisitsisini aamma takuneqarsinnaavoq. Nuummi suliffissaaleqisut suli ikiliartorput, taamatuttaaq Tasiilami. Suliffissaaleqisut kisitsisaasa ilaatigut nikerartarneri ukiup qanoq ilineranik pissuteqartarput. Paamiuni Ittoqqortoormiinilu suliffissaaleqisut amerlassusaat aalaakkaasuupput. Nuna tamakkerlugu 2021-mit 2022-mut suliffissarsiortut amerlassusaat 1524-niit 1223-nut ikileriaateqarput. ”Taamatut nikeriarneq kommunimut tamarmut iluaqutaassaaq, sulilu taamatut ingerlanissaa anguniartuassavarput”, Inge Olsvig Brandtip, kommunimi Suliffeqarnermut Isumaginninnermullu Ataatsimiititami siulittaasup oqaatigaa.
Ukiuni arlalinni aningaasaqarnikkut ingerlalluarnerup kingunerisaanik inuit amerlanerusut sulilersissimavaat.
Ukiuni kingullerni aningaasaqarnikkut ingerlalluarneq suliffissaaleqisunut sunniuteqangaatsiarsimavoq, arlallimmi sulilersimapput. Siunnerfeqarluni ukkassinikkullu suliffissaqartitsiniarneq pillugu suliniuteqarnikkut kommune siornatigornit suliffissaaleqisunik amerlanerusunik suliffinnut innersuussisinnaalersimavoq. Inge Olsvig Brandtip Suliffeqarnermut Isumaginninnermullu Ataatsimiititami siulittaasup oqaaseqaatigaa: ”Sulisut suliffissaaleqisunik ikilisinneqarnissaannut annertuumik suliaqarsimasut nersualaarusuppakka. Kommunimit amerlanerusut sulilersinneqarnissaat siunnerfeqarluni suliniuteqarsimaneranik uppernarsaasuuvoq. Politikikkut amerlanerusut sulilersinniarlugit piumassuseqarluarneq pissutigalugu pitsaasumik nikeriaateqartoqarpoq. Piumassuseq siunissami attatiinnarneqassasoq naatsorsuutigaara.”
Piginnaasanik ineriartortitsineq suliffissaaleqisunik ikilisitsiniarnermi atugarissaarnerulernissamullu aqqutissaavoq.
Ilinniagaqarneq, piginnaasat atugarissaarnerlu ataqatigiissut kikkut tamarmik ilisimavaat. ”Taamaattumik innuttaasut suliffissaaleqisut pillugit piginnaasat ineriartortinneqarnissaat pingaartinneruneqarnissaat aalluttariaqarparput. Suliffissaaleqisut ikiornerisigut inuit inuiaqatigiillu iluaqutissaannik tunniussaqassaagut.” Inge Olsvig Brandt, kommunimi Suliffeqarnermut Isumaginninnermullu Ataatsimiititami siulittaasoq oqarpoq. Suliffissaaleqisut piginnaasaat pikkorissartitsinikkut, ilinniagaqartitsinikkut kiisalu kommunimi suliffeqarfiit suleqatigalugit ineriartortinneqarnissaat kommunimit anguniagaavoq.
Suliffeqarfik peqqinnartumik nukittuunillu ataatsimuulersitsisarpoq
”Suliffeqarneq aningaasaannarnut tunnganngilaq. Naak suliffissaaleqisut ikilerinerisigut inuiaqatigiit aningaasaataannut ajunngitsumik kinguneqartaraluartoq, suliffeqarnerup iluaqutissarpassui allat puigussanngilagut. Inge Olsvig Brandt, kommunimi Suliffeqarnermut Isumaginninnermullu Ataatsimiititami siulittaasoq oqarpoq.
Nangilluni oqarpoq: ”Pitsaasunik suleqateqarluni aalajangersimasumik suliffeqarneq arlalinnut peqqinnartumik ataatsimuulersitsinermut tunngavissiisarpoq. Allattut oqaatigalugu suliffik atorfiinnaaneq ajorpoq, allarpassuaqarporli. Suleqatit pitsaasut ikinngutaallualersinnaasarput. Ikinngutit suliffiup avataani aamma pingaaruteqarluinnarsinnaasut. Suliffik peqqinnartunik nukittuunillu ataatsimoortarfiusutut aallarniutaasinnaavoq. Inunnut ilaannut ataatsimoortarfiit taakku suliffeqalernermut aqqutaasinnaalluarput.”