Apummik ilusilersuineq “Nuuk Snow Fest” martsip aappaani aallartissaaq ullunilu sisamani ingerlanneqassalluni. Pilersaarut inissinneqareerpoq, Nuuk Snow Fest ingerlanerani ilusilersuisussat kisimik sammisassaqartinneqassanngillat – tamanut sammisassaqarumaarmat. Pilersaarut uani takuuk.
Sisamanngornermi martsip aappaanni iligiit 14-it apummik ilusilersuillutik aallartissapput, aaqqissuisut makitsereerpata iligiit sorliit aput sorleq ilusilersussaneraat. Ilusilersuisussalli kisimik suliaqassanngillat, apummik ilusilersuinissarmi kisiat pilersaarutaanngilaq. Maria Bach Kreutzmann ilaqutariinnut meerartalinnut ilusilersuiffiup eqqaani (Nuup Saavani) uumasorujussuarnik ujaalertitsissaaq aammalu Nunatta Katersugaasiviani uumasorujussuit pillugit oqalugiassalluni. Pernille Kreutzmann Larsen “Siunissami imminut qanoq takorloorpit” qulequtaralugu meeqqanut sammisassaqartitsissaaq, Nuutoqaq – Nuummi katersugaasivimmi.
“Uagutsinnut pingaaruteqarsimavoq ukioqatigiiaat tamarmik apummik ilusilersuisoqarnerani nuannisartinneqarnissaat. Ullukkut ilaqutariinnut nuannisarfiusinnaajumaarpoq unnukkullu tusarnaartitsinerpassuit ingerlanneqartarumaarlutik”, suliniummi ingerlatsisoq Alberte Parnuuna taama oqarpoq.
Nuuk Snow Festertoqarnerani tusarnaartitsinissarpassuit siulliat unnuk siullermi ingerlanneqarumaarpoq. Tusarnaartitsisoqalinnginneranili borgmesteri Avaaraq Olsen oqalugiarluni aammaassaaq. Nuuk Snow Festertoqarnerani tusarnaartitsivimmut siulliulluni qaqisussaq tassaavoq DJ Liam F. Rosbach.
Nuuk Snow Fest ingerlanerani uumasorujussuit pillugit sammisassaqartitsisoqarlunilu oqalugiartoqassaaq, tassani Maria Bach Kreutzmann ingerlatsisuussaaq. Nipilersornermik sammisassaqartitsisoqassaaq aammalu Nunatta Katersugaasiviata ammasarfii sisamanngornermi, tallimanngornermi kiisalu arfininngornermi sivitsorneqassallutik, nal. 13.00-imiit 21.00-ip tungaanut ammasassalluni. Tusarnaatitsivik nipilersortartorpassuarnit qaqiffigineqartarumaarportaaq.
NAPA, NORDEN suleqatigalu Nuuk Snow Festimut tapiinerisa periarfissaalersippaa Savalimmiuniit nipilersortartoq HÚS tikisissallugu, taanna tusarnaartitsinermi saniatigut Sermersuumi Nipilersornermik ilinniarfimmi aamma sammisassaqartitsiumaarpoq.
Small Time Giants tallimanngornermi tusarnaartitsiumaarput arfininngornermilu POP-UP-tusarnaartitsisoqarnerani nipilersortartut pingasut tusarnaartitsiumaarlutik. Meeqqanut tusarnaartitsinerit aamma ingerlanneqarumaarput, tassani Maali & Marius aamma Aimeé Olsen nipilersussallutik.
Tapiissuteqartarfik Sermeq ukioq manna tapiissuteqaqqinniarluni aalajangersimavoq. Tamaasilluni inuusuttuaqqat Paamiuneersut Nuummukarlutik peqataajartorsinnaanerat piviusunngorsinnaalerluni.
“Inuusuttuaqqat Nuup avataaneersut Nuuk Snow Festimi peqataasinnaanerat nuannaarutigeqaarput. Ukioq kingulleq aamma taamaliortoqarpoq, inuusuttuaqqat Nunatta Kangianeersut Nuummukarlutik peqataajartormata. Tapiissuteqartarfik Sermeq tapiissuteqarsimaneranut qujassuteqarpugut. Kommunimi inuusuttortagut imminnut naapinnissaannut periarfissiivoq”, Alberte Parnuuna oqarpoq.
Apummik ilusilersuineq ulluni sisamani ingerlanneqassaq, martsip aappaani martsip tallimaanut, ulloq kingullermi ajugaasut nalunaarutigineqarumaarlutik. Pilersaarut uani takusinnaavat