Arctic Winter Gamesimi peqataasut Yukonimiit angerlartut ujaminik 85-inik aammalu ataqqinaataasumik timersortartorpalaartumik takutitsisimanermut nersornaatigineqartartoq, Hodgson-trofee angerlaappaat.
Borgmesteri Avaaraq Olsen AWG-mi ajugaasimasut 16-it Kommuneqarfik Sermersuumeersut ullumi arfininngornermi februaarip aqqarngani persuarsiutiginiarlugit Kommunip Illorsuanut qaaqquai.
“Tulluusimaruutiginerpaasara tassaavoq ajugaanissinni kusanartumik takutitsigassi, taamaasillusi Kalaallit Nunaat Hodgson-trofeemik angerlaassinissaa qulakkeerlugu, Arctic Winter Gamesip anersaava anersaaralugu takutitsinikkut. Tamanna takutippaa nunatsinnit aallartitassatut piukkunnaateqarluinnarnersinnik”, borgmesteri oqalugiarnermini ilaatigut taamak oqarpoq.
Avaaraq Olsen Kalaallit Nunaat AWG-mi angusarissaarluarsimanerannut sunniuteqarluarsimasut allat aamma qujaniarfigai.
“Kalaallit Nunaat sinnerlugu AWG-mi inuusuttut peqataasinnaanerannik takutitsilluarsinnaanerannillu qulakkeerinneqataasut, tassa nammineq kajumissuseq atorlugu suleqataasut aamma qujaffigerusuppakka. Ilaat sungiusaasuupput ilaallu ikiuuttuusarlutik, taakku ulluinnarni timersoqatigiiffinni suleqataalluartuupput. Taakku ilaat angajoqqaajupput qitornami soqutigisaat pikkoriffigisaannillu tapersersuiuartut. Uanga nammineerlunga meeraagallarama timersortorujussuunikuuvunga, taamaammat ilisimavara timersornikkut angusaqarusussuseqaraanni angajoqqaaniit tapersersorneqarnissaq qanoq pingaaruteqartigisoq. Angajoqqaat qitornaminnut tapersersuisarnerit qitornaannut kisimi iluaqutaanngilaq. Tapersersuiuarneri nunatsinni peqatigiiffilerinermut uumatitsisuupput aammalu inuusuttunut timersortartut inuusuttoqatiminnut maligassiusuupput”, borgmesteri oqarpoq.
