Paamiuni Ilaqutariinnik Sullissivik Tilioq ilaqutariinnik, ataasiakkaanut ilaqutariinnullu aqqutissiuisarpoq, naartusunut siunnersuisarpoq allarpassuarnillu suliaqartarluni. Taakku saniatigut sapaatit akunneri tamaasa tamanit peqataaffigineqarsinnaasumik ataqatigiissarluni assassoqatigiitsitsisarluni.
Illoqarfiup ilaqutariinnut sullissivia Paamiut Kommuneani sanarfinermut teknikkeqarnermullu immikkoortortarisimasaani, ininik pingasunik quleriilimmi inissisimavoq. Ilaqutariinnut sullissivik immikkoortortaqarfinnit assigiinngitsunit pingasuusunit atorneqarpoq, meeqqanut ilaqutariinnullu immikkoortortaqarfik, inuusuttunik siunnersuisartut aammalu qimarnguivik allaffeqarlutik.
Tiliumi tunniusimallutik sulisut aamma assassoqatigiinnissamik unnussiuaartitsisarpoq, aaqqissuussaq 2022-imi novembari aallartippoq.
”Illoqarfipput neriniartarfimmik, cafemik klubbimilluunniit ataatsimoorfiusinnaasumik peqanngilagut. Naak tamatta immitsinnut nalunngikkaluarluta misigisimavugut angerlarsimaffiup avataani naapiffiusinnaasumik amigaateqartoqartoq”, Tiliumi aqutsisoq Kristian Dahl oqarpoq.
Assassoqatigiittarneq nuannarineqarluarmat ataavartumik ingerlanneqartarnissaa aalajangerneqarsimavoq. Marlunngornerit tamaasa Tiliumi init ilaat assassorfissatut tulluarsarneqartarpoq, assassoqatigiinnermilu innuttaasut piumasut peqataasinnaallutik.
”Atuisugut oqarput aaqqissuussaq iluaralugu, qiimmassaqatigiinnissamik periarfissiimmat. Unnuk atorneqartarpoq illaqatigiinnermut, inuit allat naapinnissaannut assassornermilu sulianik paarlaasseqatigiiffittut”, Kristian Dahl oqarpoq.
Tiliumi sulisut paarlakaallutik marlunngornikkut assassoqatigiitsitsisarput, Paamiunilu najugaqaruit peqataanissamullu soqutiginnillutit, taava Tiliumut ornigullutik peqataajartorsinnaavutit, marlunngornerit tamaasa nalunaaqutaq 19.00 assassoqatigiittoqartarpoq.