Meeqqat Nuummi Nakuusa-meersut 2022-mi Meeqqat Ataatsimeersuarnerannit oqariartuutigisatik ilaatigut kommunalbestyrelsimut aammaa Nuummi Najukkami Ataatsimiititaliamut oqalugiarnerminni oqaatigaat.
Nakuusa tassaavoq UNICEF-ip aamma Naalakkersuisut akornanni suleqatigiissitaq Nunatsinnilu meeqqat inuusuttullu sapinngisamik pitsaanerpaamik atugaqarnissaannik qulakkeerinninniartoq. Kattuffiup 2022-mi meeqqat nuna tamakkerlugu Meeqqat Ataatsimeersuartinneqarneranni 43-t katersuutsippai tassanilu Nunatta siunissaa najukkanilu silaannaap allanngoriartornera qitiutinneqarlutik.
Ataatsimiinnermit oqariartuutit nuna tamakkerlugu aalajangiisartunut inersimasunullu oqaatigineqarput, ullormili qitiusoq tassaalluni Kommuneqarfik Sermersooq. Borgmesteri Avaaraq Olsen, Meeqqanut Atuarfeqarnermullu Ingerlatsivimmi pisortaq Lone Nukarak Møller kiisalu Meeqqanut Atuarfeqarnermullu Ataatsimiititamut ilaasortat aggersarneqarput.
Naja Kastrup Solvig, Alda Rós Olsen Rosing aamma Niklas Jensen NAKUUSA sinnerlugu aallartitatut peqataapput taakkuullutillu oqalugiarput, ilaatigut oqariartuutaat sakkortullutillu aalajangiisartunut kaammattuutaaginnaratik nuna tamakkerlugu inersimasunut tamanut avatangiisinik atueqqittarnermullu tunngasunik oqariartuuteqarlutik.
”Apisarnera kinguaraluttuinnarpoq, sermersuaq aakkiartorpoq, Tunumi piteraq sakkortusigaluttuinnarpoq tamakkulu ilaatigut nerisareeqatigiinnut, uumasunut pinngortitatsinnullu kusanaqisumut kingunerluuteqarput… Silap allanngorujussuarsimanera uatsinnut annilaangalersitsivoq ernumatitsillunilu. Annilaangassutigisarput, suna tullinnguuppa… Immitsinnut ikiorniassagatta allannguititsiniarluta iliuutsivut akisussaaffigisariaqarpavut”, aallartitaasut pingasut oqalugiaamminit ilaatigut taamatut oqarput, aammalu silaannaap allanngoriartornera, najukkani mingutsitsineq, eqqakkat, atueqqittarneq nerisassanillu eqqaasarneq oqaatigineqarlutik.
Oqalugiarnermi inersimasut ullumikkut suliniutaannut isorinninnerinnaanngilaq pitsanngorsaataasumilli siunnersuuterpassuarnik assersuutinillu iliuuseqaqqusinermik kaammattuuteqarlutik.
Borgmesteri Avaaraq Olsen kakkanaaraluni oqarpoq: ”Aalajangiisartut saallugit qanoq pitsaanerusumik iliorsinnaanersugut pillugu saqqummernersi torrak. Siunnersuutitsialappassuupput aamma ilumoortortaqarput. Nuna tamakkerlugu meeqqat assigiimmik ernumassuteqarnerat aaqqiivigerusullugulu oqariartuutigineqartoq maluginiagassaalluarpoq. Oqalugiarnermi immikkoortut amerlanerpaat pillugit suliniutinik ingerlatatsinnik peqareerpugut taakkuuppummi ilungersunartut ukkatarisariaqakkatut toqqarneqarsimasut. Aamma pitsaanerusumik iliuuseqarsinnaanerput pillugu oqariartuuteqarnerat ilumoorpoq. Pitsaanerusariaqarpugut.”
Oqalugiaat tamaat atuarusukkukku atuarsinnaavat uani.
