AG-mi Sermitsiamilu apersuinerit marluk ersersippaat Kommuneqarfik Sermersuumi innuttaasut marluk angerlarsimaffeqanngitsuuneq nappaateqarnerlu pillugit pisariaqartumik ikiorserneqarnissamut neqeroorfigineqarsimanngitsut.
Allaaserisani taakkunani marluusuni annertuumik kukkunerit ajornartorsiutaapput.
Nipangersimasussaatitaanerup kommune suliap ingerlanneqarneranut piviusunik saqqummiisinnaatinngilaa. kisianni Suliffeqarnermut Isumaginninnermullu Ingerlatsivimmit nalilerneqarpoq tusagassiorfinnit saqqumiussinerup aamma suliap ingerlanneqarnera journalimi allassimasoq annikitsuinnarmik assigiissuteqarsimasut.
”Nalinginnaasumik nutaarsiassani kukkusumik paasissutissiisoqaraangat soqutigineq ajorparput, innuttaasut sanngiitsorujussuit oqaaseqartut eqqarsaatigalugit, kisianni sulisut suliaannut suliaqarfigisaannullu isornartorsiorfigitittunut pisussaaffeqarpugut. Taamaattumik massakkut killiliinissaq toqqarparput” Inge Olsvig Brandt, Suliffeqarnermut Isumaginninnermullu Ataatsimiititami siulittaasoq oqarpoq.
Inunnik atugarliortunik allaaserinninnerni assuarnartumik kukkusunik paasissutissiisoqartartoq Ingerlatsivimmit misigineqartarpoq, tamannalu Inge Olsvig Brandtimit tupigineqarpoq.
”Ersarissumik politikkeqarpugut, allaaserisat piviusunik paasissutissartaqarnersut misissussallugit, suliallu innuttaasut akuersissuteqarneratigut taamaallaat oqaaseqarsinnaasarluta. Nutaarsiassalli paasissutissanik annertuunik kukkusunik saqqummiussinerat innuttaasunut iluaqutaanngilaq. Tamatumunnga atatillugu innersuussutigerusuppara nutaarsiassat tusagassiinermi ileqqorissaarnissamut malittarisassanik malinninnissamut pisussaaffeqarmata”, Inge Olsvig Brandt oqarpoq.