Kuummiuni aalisakkanik tunitsivik allilerneqaleruttorpoq, tamannalu isumaqarpoq tunitsivik aalisakkanik amerlanerusunik tigusisinnaalerneranik. Sanarfinermut Avatangiisinullu Ataatsimiititaliamit tamanna nuannaarutigineqarpoq, kisianni aamma aporfiusinnaasunik tikkuagaqarput.
Tunitsivimmik alliliisoqarnerata kinguneraa tunitsivik aalisartunit pilersorneqarnissani pisariaqartimmagu.
Piniartulli aalisarnermut ikaarsaarniarnerminni aporfeqarput, tassani aningaasaaliinissaq pisariaqartinneqarmat.
”Tassani isumaqarpugut piniartut aallarnisaasutullu tapersersorneqarsinnaasut, tassami piniarnermiit aalisarnermut ikaarsaarneq aallarnisaanertut isigineqartariaqarmat. Kissaatigaarput piniarnermiit aalisarnermut ikaarsaariarnermi ESU bankillu suleqatigiillutik aningaasaliisinnaanermut periarfissanik ujartueqataasinnaassasut”, ataatsimiititaliami ilaasortat allagaqarput.
Piniartut aalisartullu aalisarneq pillugu isumasioqatigiittoqarnerani sisamanik innersuussuteqarput, tassaallutik; Piginnaasanik ineriartortitsineq, attaveqaatinut tunngasut, nioqqutissanik ineriartortitsineq/nutaaliorneq aammalu aningaasaqarneq/aningaasalerineq.
Tassani tikkuarneqartut ilagaat, motoorilerinermut glasfiberilerinermullu pikkorisarnerit, aningaasanik aqutsineq, aalisakkanik assartuussinerit, atortunik amigaateqarneq soorlu kran-i puttasullu, aalisakkanik allanik tunisassiorsinnaaneq soorlu suaat aamma qullukkat, piginneqatigiilluni anginerusunik angallatitaarsinnaaneq, aalisakkanut akigitinneqartut pitsaanerusut kissaatigineqarputtaaq.
”Nuannaarutigaarput aalisartut nammineq siunnersuutiminnik immersueqataalluarmata. Peqataasut tunniusimallutik peqataanerat assut nuannaarutigaarput”
Sanarfinermut Avatangiisinullu Ataatsimiititaliaq sinnerlugu
Finn Karlsen
Peter Davidsen
