Nuuk gymnastikforening aamma DGI Fyns Repræsentationshold peqatigiillutik Meeqqanut Atuarfeqarnermullu Ingerlatsivik neqeroorfigaa, 4-5.klssit eqaarsaarnermik paasisassarsiorfittut suleqatigiittoqarnissaa (Workshop). Tamannalu tigulluarneqarpoq.
Ulluni makkunani atuartut 4-5.klassit ilinniartitsisutik peqatigalugit eqaarsaarnermik paasisassarsioqatigiiffittut suleqatigiiffigaat (Workshop). Taannalu Nuummi ingerlanneqareerpat, Tasiilami, Kulusumi, Kuummiunilu ingerlanneqassaaq.
Eqaarsaartartut neqeroorutaat
Eqaarsaarneq ukkataralugu paasisassarsiorfittut suleqatigiiffigisaat (Workshhop) takutitsinertaqartussaq eqaarsaartartoqatigiit Nuuk Gymanstikforening aammalu DGI Fyns repræsentationshold Kommuneqarfik Sermersuumut neqeroorutaavoq.
”Nuannaarutigeqaarput, takutitsisartoqatigiit aammalu Nuuk Gymnastikforening siunnersuutertik tunniummassuk, taamaasillutik atuartuutigut eqaarsaarnemik ilikkagaqarlutillu misileraassammata. Naatsorsuutigaarput atuartut eqaarsaarnermik soqutiginninnerulernissaat, soorunalumi aamma ilinniartitsisut pissarsiaqaatigissallugu”, taamak oqarpoq atuarfeqarnermut ingerlatsivimmi pisortaq Riikki Grønvold.
Atuartitsinermi aalanerunissaq
Kommuneqarfik Sermersuumi politikkikkut suleqatigiinnissamik isumaqatigiissummi kissaatigineqarpoq, meeqqat inuusuttullu akornanni peqqinneq, aalanerunissarlu anguniarneqassasut. Tamannalu aamma atuarfeqarfinni malugineqarpoq, peqqinnermik aalanerunissamillu aamma aallutsileruttorlutik.
”Atuartitsinermi issiaannarluni suliaqartitsinermi atuartut ataannartumik akunnerni marlunni issiatinneqarnermikkut piffissap ilaannaanni ataavartumik tamaviaarsinnaasartut misissorneqartarsimavoq. Taamaattumik atuartut atuartinneqarnerminni aalanerulernissaat `nukissanik aalleqqillutik` anguniarneqarnerulerpoq. Tamannalu tapersersorlugu aqqutissiueqataaniarnermut suliniummut atuarfeqarfiit peqataatinneqarnissaat Atuarfeqarnermut Immikkoortortaqarfimmiit akueraarput”, taamak oqarpoq Riikki Grønvold.
