Kommunalbestyrelsep aalajangerpaa, timersoqatigiiffinnut tapiisarnermut malittarisassat ukiumi nutaami allanngortinneqassasut timersoqatigiiffiit kissaataat tunngavigalugit. Taamaaliornikkut naleqqunnerusumik tapiissutit agguataarneqartalissapput.
Ukioq nutaaq aallarnerfigalugu timersoqatigiiffit tapiissutinut malittarisassat allanngussaaq, malittarisassat ullumikkut atorneqartut taarserlugit. Timersoqatigiiffiit arlaqartut malittarisassat nutarterneqarnissaat kissaatigisimavaat. Kommunalbestyrelsillu piumasarineqartut tusaaniarlugit aalajangerput, ukioq nutaamiit peqatigiiffinnut tapiissutit pillugit malittarisassat allanngortissallugit.
”Inuiaqatigiinni peqatigiiffiit pingaarutilerujussuupput, pitsaasunillu sinaakkuteqartariaqarlutik. Uagut, kommunalbestyrelsiusugut peqatigiiffiit piumasaat tusaaniarpagut, taakkuami peqatigiiffilerinermi suut pitsaanerunersut ilisimanerpaavaat. Nuannaarpugullu kissaataannik piviusunngortitsisinnaagatta. Peqatigiiffinnullu sunniuteqarluarnissaa ilimagaarput, ilaasortaannut minnerunngitsumillu siunissami inuiaqatigiinnut” taamak oqarpoq borgmesteri Avaaraq Olsen.
Timersoqatigiiffit tapiissutinut malittarisassaq 2019-imi atuutilersinneqarpoq, misiliutaasumillu 2021-ip tungaanut atuussimallutik. Piffissallu taassuma ingerlanerani sunngiffimmi sammisaqartitsisut timersoqatigiiffinniit naammagiittalliuutinik misigisaqartarsimapput.
Sunngiffimmi sammisaqartitsisut Timersoqatigiiffiit Kattuffiat peqatigalugu timersoqatigiiffeqarnermut tapiissutit sammisimavaat, timersoqartigiiffinnilu misilittakkat katersorlugit. Timersoqatigiiffiillu isumaqarput tapiissuteqartitsisarnermut malittarisassat tulluuttuunngitsut. Tamannalu tunngavigalugu klubbit assigiinngitsut allanngortoqarnissaannik piumasaqarput. Misissuinerummi takutimmagu timersoqatigiiffiit assigiinngitsut tapiissutit angalanernut atornerusaraat, tamannalu aamma malittarisassani nutaani isiginiarneqarpoq. Taamaammat 2023-mi peqatigiiffinnut tapiissutit annersaat angalanernut tapiissutaasalissallutik.
”Tapiissuteqarnermut malittarisassaq nutaaq pitsaanerusumik agguataarinernut atorneqalissaaq. Tassa timersoqatigiiffiit aningaasartuutiginerpaasartagaat isiginiarnerullugit, soorlu unammersuaariarnernut angalanernut. Taamaaliornitsigut qulakkeerniarparput pitsaasumik aningaasanik tapiisoqartalernissaa. Timersoqatigiiffiup ingerlanneqarneranut tapiissutit annikillisissavagut, angallannernulli tapiissutit qaffanneqassallutik”, taamak oqarpoq sunngiffimmi immikkoortortaqarfimmi fagchefi, Frederik Lundblad.
Tapiissuteqarsinnaanermut aningaasat imatut pingasunut agguarneqarput; Timersoqatigiiffiup ingerlanneqarneranut tapiissutit, ilaasortaanermut tapiissutit, aammalu angalanernut tapiissutit.
Assersuut, Nuummi tapiisarneq aallaavigalugu, imatullu agguataarneqarsimapput (1,7 mio. Kr. Ukiumut tapiissutigineqartassallutik)
| Timersoqatigiiffiup ingerlanneqarneranut tapiissutit 10% | 170.000 kr. |
| Ilaasortaanermut tapiissutit 15% | 255.000 kr. |
| Angalanermut tapiissutit 75% | 1.275.00 kr. |