Borgmesteri Avaaraq Olsen pingasunngormat oktobarip pingajuani Tasiilamut tikippoq, borgmesterilu Tasiilamiinnermini pulaagassarpassuisa ilaanni inuusuttut kulturikkut illuat siulliit ilaattut pulaarpaa.
Avaaraq Igdlo naapippai, Igdlomi aqutsisoq Hans Poul Andersen, Tasiilami områdelederi Hjørdis Viberg kiisalu inuusuttut Igdlomik atuisartut 25-t missaaniittut. Taakkumi Igdlomi sulerisoqartarnersoq saqqummiuppaat, borgmesterilu taakaniinnini iluatsillugu inuusuttunik oqaloqateqarpoq.
”Igdlormiut maligassiuisuupput. Illoqarfimminniinnanngitsoq, kisianni aamma kommunitsinnut nunattalumi sinneranut. Malugisinnaavara maani suliaqartut tulluusimaarlutik suliaqartut aammalu suliaat sunniuteqartut. Igdlo ullut tamarluinnaasat atorneqartarpoq, inuusuttuniinnaanngitsoq kisianni aamma inersimasunit. Igdlo Tasiilami katersuuffiuvoq, malugisinnaavara inuusuttut piumassuseqarluarlutik allanngueqataarusuttut, imminnut nunaqqatiminnullu iluaqutaasussamik”, borgmesteri Avaaraq Olsen taama oqarpoq.
Nammineq kajumissuseq atorlugu sulisut arfineq-sisamaasut ikiuuttarput Igdlo ullut tamaasa ammanissarnissaa qulakkeerniarlugu, Igdlomilu sammisassat amerlasoorpassuit piviusunngussappata taakku pinngitsoorneqarsinnaanngillat. Igdlomi sammineqartartut assigiinngitsorpassuupput, aallaarsimaanerniit atoqatigiittarneq pillugu paasititsiniaanernut, qimusserluni piniaqatigiinnerniit sanalukkanik suliaqarnernut. Inuusuttut nammineq kajumissusertik atorlugu kalaaliaqqami qisuit atorneqartut ulluni makkunani qalipappaat.
”Inuttut borgmesterisullu nammineq kajumissuseq atorlugu sulisunut taakkulu suliaannut qujamasuppunga. Tasiilarmiunut sunniuteqarluartuupput, suliaannullu qujamasungaarpunga”, Avaaraq Olsen oqarpoq.
Igdlomut pulaartoqarnerani najuuttut qiimapput, borgmesterilu inuusuttunik oqaloqateqarnissaminik periarfissaqarnini nuannaarutigaa, aamma kingusinnerusukkut arsaararlutik aliikkusersorput. Inuusuttut oqaloqatigineqarneri kingorna borgmesteri tikeraaqqinnissaanut pilersaarusiornermik inerneqarpoq, tassa borgmesteri peqatigalugu nivissat unnussiuaaqatigineqarnissaat pilersaarutigineqalermat.
Inuusuttut Kulturikkut Illuanni nammineq kajumissuseq atorlugu suleqataasut tassaapput:
Karna Pivat
Henninger Singertat
Lars Korneliussen
Rasmus Mikaelsen
Rina Kofoed
Sara Jensen
Henning Kunak
Thorvald O. Magnussen og
Kristian Kunak
