Pingasunngormat 5. oktobarimi timmisartoq King Air attartugaq Nuummiit Kulusummut timmisartuussitinneqassaaq. Timmisartoq Kommuneqarfik Sermersuup attartorpaa, tassami ullumikkut Tasiilap piteqqamit eqqorneqarneraniit ullut arfineq pingasunngortut sulisut timmisartumut nalinginnaasumut ilaanissartik iluatsissimanngilaat.
”Timmisartuussinermik attartorneq annertuumik aningaasartuuteqarfiuvoq, kisiannili maanna Air Greenlandimiit sullinneqarneq taamatut iluseqartillugu allanik periarfissaqartutut misigisimanngilagut. Ukiunnginnerani anorersuup ajoqusigai iluarsaattariaqarpagut. Taamaanngippat innuttaasut angerlarsimaffissaqanngillat”, Avaaraq Olsen erseqqissaavoq.
Aasaq manna nuna tamakkerlugu angallanneq puullaaqinartumik ingerlasimammat maluginngitsoorneqarsimasinnaanngilaq, kisiannili Tunumut kingunerisaasut taama eqqumaffigitigineqarsimanngillat.
Kommuneqarfik Sermersuumi ingerlatsivinnit tamanit nalunaarutigineqarpoq, ukioq manna sulisut Tunumukartinnissaat ajornartorujussuusimasoq, aammalu akuttunngitsumik suliniutaasussaagaluit kinguartinneqartariaqartarsimasut taamaativinneqartariaqarlutilluunniit.
”Sulisutta apuunnissamut periarfissaqannginnerat peqqutigalugu innuttaasunik kiffartuussinerput ajornerulersoq misigalugu nuanniittorujussuuvoq. Tunumi silarlukulanera paasilluarparput, tamatumali peqatigisaanik Tasiilaq piaaraluni tunulliunneqartartoq misigisimavarput”, Kommuneqarfik Sermersuumi borgmesteri Avaaraq oqarpoq. Borgmesteri Avaaraq Olsen nammineerluni pingasunngorpat timmisartumut attartukkamut ilaassaaq.