Meeqqanut Ilaqutariinnillu Ingerlatsivik meeqqat aliasuutillit ataatsimoortarfissaannik pilersitsinissaminik pilersaaruteqarpoq. Tassungalu atatillugu kommunimi isumaginninnikkut sullissisut ulluni pingasuni pikkorissartinneqarput, ilaqutariit iluanni alianartunik nalaataqartoqartillugu, soorlu avittoqarnerani imaluunniit ilaqutariinni toqusoqarsimatillugu, qanoq ikiuilluarsinnaarneq pillugu sammisaqarlutik.
Kommunemi isumaginninnikkut sullissisut ilaqutariit annaasaqarsimasut arlallit sulinerminni naammattoortarpaat, taakkunanilu ilaqutariit meerartallit arlaqarlutik.
”Toqusoqarneranik nalaataqarneq sakkortujuaannarpoq. Toqusoorneq ukioqatigiiaanni assigiinngitsumik misigineqartarpoq. Imaassinnaavoq meeqqap siullermeerluni toqusoorneq misigigaa, meeqqallu inersimasunut sanilliullugit toqusoornermi misigissutsit allaanerusumik suliarisarpaat, inersimasunut toqusoornermik misigisaqareersimasunut sanilliullugit. Naak ilinniarsimasutut suliaqaraluarluni toqusoqarsimatillugu attortinneq pinngitsoorneqarsinnaanngilaq. Taamaammat una pikkorissarneq pingaaruteqartupilussuuvoq, sullissisutsinnummi sakkussanik pissarsiaqaatasussaammat, taakkulu pissarsiaqaatit meeqqat aliasuutillit ataatsimoortarfissaanni atorluarneqarsinnaapput”, Meeqqanut Ilaqutariinnullu Ingerlatsivimmi fagchefi Ellen Magnussen taama oqarpoq.
Ulluni pingasuni pikkorissarnermi pikkorissaasoq Aviaja Rohmann Hansen saqqummiisaqattaarpoq, kiisalu kommunimi isumaginninnikkut sullissisut sungiusaatinik ingerlatsisaqattaarlutik. Sungiusaatit ilaatigut sammineqartut tassaallutik; sullissinermi toqusumik nalaataqarnermi qanoq iliortoqarsinnaanersoq, qanorlu meeqqat imaluunniit suleqatit toqusoornermi oqaloqatigisinnaanerlugit, pisut aallaavigalugit.
Meeqqanut Ilaqutariinnullu Ingerlatsivik meeqqat aliasuutillit ataatsimoortarfissaanik pilersitsinissamik pilersaaruteqarpoq, taannaalu aallaavigalugu sullissisunut pikkorissartitsineq ingerlanneqarluni, taamaasillutik meeqqanut inuusuttunullu sullissisut aliasuuteqartunut sullissilluarsinnaanerat anguniarlugu. Ingerlatsivik palasimik siunnersortimillu, Aviaja Rohmann Hansen, suleqateqarlutik pikkorissartitsipput, Aviaja aliasuutillit ataatsimoortarfianik suliaqarnermik misilittagaqarluartuuvoq.
”Misigissutinik oqaasinnguisinnaaneq pingaaruteqarpoq, taamaaliunngikkaanni kingunerlutsitsisoqarsinnaagami. Assersuutigalugu meeraq aliasuutiminik oqaasinnguinngikkuni, aliaasutillu suliarinagit, taava meeraq ilikkarniarnermut ajornartorsiuteqalersinnaavoq. Taamaammat isumaqarpunga pikkorissartitsineq kommunip tungaaniit torrallaanerusoq. Tamanna siusinaartumik suliniuteqarneruvoq ilaqutariippassuit iluaqutigisinnaasaat”, Aviaja Rohmann Hansen oqaluttuarpoq.
Aliasuutilinnut ataatsimoortarfiup siunertaraa, meeqqanut inuusuttullu ilutigisaminnik misigisimasaminnik avitseqateqarnissaat, assersuutigalugu toqusoornermik, toqussutaasinnaasunik napparsimasunik nalaataqarnermi imaluunniit angajoqqaat avinnerinik nalaataqarnermi. Aliasuutillit ataatsimoortarfianni meeqqat isumaliutigisaminnik misigissutinillu sakkortuunik paaseqatigiinnissaminnut ilutitik peqatigalugit pissarsiaqaatigisinnaavaat.
Sullissisut akulerussimasut 25-t missaaniittut, inuussuttunik sullissivimmiit, ilaqutariinnik sullissivimmiit aammalu qimarnguvimmeersut pikkorissarnermi peqataapput. Peqataasunut ilaavoq Meeqqanut Ilaqutariinnullu sullissivimmi psykoterapeuti Andu Schiødt Olsen. Pikkorissarneq sakkussanik pissarsiffiusoq nuannaarutigaa.
”Pikkorissartarnerit allaniit allaanerulaarpoq, teoriimut tunngavallaarnani inuppalaassutsimut tunnganerugami, assersuutigalugu inunnik annaasaqarsimasunik piffissami sakkortuumi nalaataqartunik naammattuuinermi qanilaassutsimik, inuppalaassutsimik paasinninnermullu tunngasut sammigatsigit. Pikkorissarnermi aamma meeqqanut aliasuutillinnut ataatsimoortarfinnut tunngasunik paasisaqarluarpugut, aamma meeqqat nalaataqarnerlunneranni qanoq ikiorluarnerunissaanik tunngasunik saqqummiiffigineqarlutalu misilittaatinneqarpugut, aliasunneq, maqaasineq kamannerlu qanoq oqaasinnguivigineqarsinnaanersut pillugit. Taamaammat pikkorissarneq qiimmallannaqaaq”, Andu Schiødt Olsen oqarpoq.
