Kommuneqarfik Sermersuumit aatsitassarsiorfillu Greenland Ruby isumaqatiginninniarneq aallartinngitsorluunniit tunuarterfigineqarpoq. Greenland Rubyp suleqatissatut tutsuiginannginnera kommunimit tunngavilersuutigineqarpoq tassami isumaqatigiissutaasimasut maannamut suli suliffeqarfimmit naammassineqarsinnaasimannginnamik taamaattumik nutaamik isumaqatigiissuteqarnikkut tamanna allanngussasoq kommunimit ilimagineqanngilaq.
Greenland Rubymit isumaqatiginninniarnermi saqqummiisoqarnerani Qeqertarsuatsiaarmiunut atukkat ajornerulissasut takuneqarsinnaammat kommunimit isumaqatiginninniarneq tunuarterfigineqarpoq. IBA-mik isumaqatigiissut 2016-imeersoq maannakkut atuuttoq naapertorlugu ilinniartitaanermi aningaasaateqarfimmut 1 mio. kr.-inik aamma isumaginninnikkut kulturikkullu suliaqartitsinernut 250.000 kr.-inik Greenland Rubymiit aningaasaliissutaassasut pisussaaffigineqarpoq. Tamanna pisimanngilaq suliffeqarfimmiillu isumaqatiginninniarnermi pisimanngitsut qatangiinnartinneqarnissaat siunissamilu pisussaaffiiarnissaq siunertarineqarluni.
”IBA kommunalbestyrelsimit akuerineqartoq malissavarput. 2018-imi septembarip qaammataani ilassutitut isumaqatigiissut atsiorlugu Greenland Rubymit uppernarsaqqinneqarpoq aningaasaateqarfinnut marluusunut ukiut tamaasa 1,25 mio. kr.-inik akiliisassasut. Ataasiaannarlutilluunniit akiliisimanngillat. Tutsuigisassaanngillat aamma Greenland Rubymiit isumaqatigiissutit takuneqarsinnaasumik malinneqanngippata nutaamik isumaqatiginninniartariaqanngilagut”, taama oqarpoq Kommuneqarfik Sermersuumi borgmesteri, Avaaraq Olsen.
Pisariaqartitsineq naapertorlugu aningaasaateqarfinnut akiliuteqartoqartassasoq Greenland Rubymit siunnersuutigineqarpoq, tassa imaappoq tapiissuteqarnissamut qinnuteqaat akuersissutigineqarpat aatsaat aningaasat akiliutigineqartalissasut. Tamannalu ima paasisassaavoq suliffeqarfimmiit piumagunik koruuninnguamilluunniit akiliisariaqanngitsut.
”Suliffeqarfimmiit aatsitassaatitsinnik piiagassanik suliaqarsinnaatitaasut taamatut iliornerat assut pakatsinarpoq. Nunami Issittumi nannut illersorniarlugit immikkut aningaasaateqarfiliorsimallutik Qeqertarsuatsiaarmiunut pisussaaffimminnik piviusunngortitsinnginnerat paasiuminaatsippara”, Avaaraq Olsen oqarpoq.
IBA-mik isumaqatigiissutit suliffeqarfimmiit kissaatigineqartut kisiisa malinneqartassappata siunissami aatsitassarsiorniarluni suliniutinut annertuumik kinguneqassasoq borgmesterimit erseqqissaatigineqarportaaq.
”IBA-mik isumaqatigiissummi siunertarineqartoq tassatuaavoq aatsitassarsiornerup najukkami innuttaasunut iluaqutaanissaa qulakkiissallugu imaassanngilarlu suliffeqarfiit nunani allaneersut kisimik iluanaarutigissagaat. IBA-mik isumaqatigiissut pissarsiassanik millisaasussatut siunertaqartoq borgmesteritut peqataaffiginianngilara. Nunatsinni aatsitassat najukkami innuttaasunit iluaqutigineqassanngippata piiaanissaq siunertaqanngilaq”, Sermersuumi borgmesteri taama oqarpoq nangillunilu
”Greenland Rubymiit isumaqatigiissutaasut malissinnaagaat uppernarsarsinnaanissaata tungaanut, tassa najukkami innuttaasunut taarsigassami akilernissaaat takoqqaartinnagit kommunip tungaaniit isumaqatiginninniassanngilagut”.
IBA-mik isumaqatigiissut kommunip, Namminersorlutik Oqartussat suliffeqarfiullu akornanni pisarpoq IBA-millu isumaqatigiissutip atorunnaarsinneqarnissaanut periarfissatuaasoq tassaavoq suliffeqarfiup aatsitassarsiornissamut akuersissutaanik atorunnaarsitsinissaq. Naalakkersuisut tamanna aalajangigassaraat.
”Soorunami tamanna pinngitsoortikkusunneruara taamatulli pissusilersornerat allanngussanngippat atorunnaarsitsinissaq Naalakkersuisunit isumaliutigineqartariaqarsoraara. Isumaqatigiissutinik malinninnissamut piginnittussanut tulliuttunut kajumilersitsissasoq qularutiginngilara”, Avaaraq Olsen aalajangiusimalluni oqarpoq. Isumaqatiginninniarnermi aaqqiissuteqartoqarnissaa neriuutigaa.
”Greenland Rubymiit suliffeqarfippassuit akileraarutitigullu isertitat pilersinneqartut qujarutigaakka, taamaattoq isumaqatigiissutit suliffeqarfimmiit malinneqartariaqartut pillugit kimigiisertariaqarpugut”, taama oqarpoq.