Attaveqaatit angallannerlu

Ingerlannginnerni usitit eqqumaffigikkit

Sanarfinermut Avatangiisinullu Ingerlatsivimmit assartuinermut tunngatillugu usinik qularnaarinermut malittarisassat pillugit eqqaasitsiissumik Nuummi assartuinermut sanaartornermullu suliffeqarfiit saaffigineqaqqammerput. Namminersortut malittarisassanik aamma malinninnissaat pingaaruteqarpoq.

Assartuinermut sanaartornermullu suliffeqarfinnut saaffiginninnermut pissutaasoq tassaavoq avatangiisinut immikkoortortaqarfimmit maluginiarneqarsimammat usit lastbilinut naammattumik isumannaarsorneqarsimanngitsut amerliartortut, taamalu ingerlatsinerup nalaani usinik katatsisarneq annertusiartortoq.

Angallattunut allanut inunnullu pisuttunut ulorianarpoq, taakkumi usinit eqqorneqarsinnaapput.

Biilinik usit nakkutigineqarnerat saaffiginnissutillu politiinit isumagineqartarput, taamaattorli angallattut tamarmik iluaqutigisussaavaat usinik angallassisartut angallannermi suut tamaasa isumannaarsorluaqqaarlugit angallassisarnissaat. Tamanna aamma namminersortunut atuuppoq, assersuutigalugu nutsernermut atatillugu.

Usinik netinik, qilerutinik assigisaannilluunniit isumannaarsorneqanngitsunik angallassineq inerteqqutaaginnarnani aamma aqqusinernut assut akornusiisinnaasarput, tassa aqqusinermi ujaqqanik allanilluunniit aqqutigineqaratarsinnaasunik aqqusinerniittoqaraangat. Tamatuma saniatigut usit katanneqarsimasut aqqusinerniit peerneqartinnagit angallannermik unittoortitsisinnaapput kiisalu innuttaasut allat ajutoortinneqarsinnaapput.

Taamaattumik Kommuneqarfik Sermersuumit usinik assartuisartunut tamanut angallassinerup aallartinnginnerani usit isumannaarsorluartarnissaat inassutigineqarpoq.