Services

Danskit ministeriat Meeqqanik Ilaqutariinnullu sullissivimmut pulaarpoq

Danskit kalaallillu inunnik sullissinermi suleqatigiinnerat, danskit socialministeriat Astrid Krag, Nuummi Meeqqanik Ilaqutariinnullu sullissivimmi pulaarnerani ukkatarineqarpoq.

Suleqatigiinneq 2020-mi aallartinneqartoq, suliniutinik assigiinngitsunik imaqarpoq, taakkulu meeqqanut inuusuttuaqqanullu atugarliortunut atugarisaanut pitsanngorsaanissamut tunngaveqarput. Suliniutit ilaat kommunit suliaannut attuumassuteqarput, taamaattumillu Kommuneqarfik Sermersuumut aamma attuumassuteqarlutik, ukiunilu marlunni suliniartoqarsimanerani inernerit ullumi saqqummiunneqarput. Kommuneqarfik Sermersuumi Meeqqanik Ilaqutariinnillu sullissivimmi sulineq ataatsimoortinneqarsimapput, sulisut pikkorissartinneqarsimallutillu ilinniartinneqaqqissimallutik. Taakkua saniatigut angalaqatigiinnik pilersitsisoqarsimavoq, kommunimi sumiiffinni tamani meeqqanik ikorfartugassanik isumaginnittussatut sulisussat aammalu inersimasut meeqqamik kinguaassiutitigut innarliisimanut imaluunniit eqqarsaateqartartunik katsorsaanissamut neqeroorummik pilersitsisoqarsimalluni.

”Suliniutit assigiinngitsut saqqummiussinnaallugit nuannerpoq. Isumaginninnerup iluani ukiuni kingullerni suliniuteqartoqangaatsiarnikuuvoq taakkulu kommunitsinni ilaqutariippassuarnut iluaqutaasimallutik”, Kommuneqarfik Sermersuumi borgmesteri Avaaraq Olsen taama oqarpoq.

Danskit kalaallillu isumaginninnerup iluani suleqatigiinnerat ukioq 2023-p tungaanut ingerlaqqissaaq.