Atuareernerup kingorna ornittakkami atuisartut ippassaq immikkuullarilluinnartumik misigisaqarput. Prinsessemiimmi pulaarneqarput. Kunngissap nulia Mary WWF-mi illersortitut inissisimavoq, taamaammallu ippassaq ullup ilaa Nuummi eqqakkat plastikiusunik katersinissamut atussallugu aalajangersimalluni.
Tamanna aaqqissuussaq Aqqalummi aallartinneqarpoq. Borgmesteri Avaaraq Olsen Kunngissap nulia Mary tikilluaqquaa, avatangiiseq pillugu aammalu meeqqanut atugassarititaasut pillugit kunngeqarfimmi tamarmi suliniuteqartarneranut qujaniarfigalugu.
Meerarpassuit qilanaaqisut ataatsimoorlutit Kunngissap nulianut Marymut tunissutissanik sanasimapput, tunissutissallu puussiamik, nammineq kusassakkaminnik poorneqarsimasut Kunngissap Nulianut Marymut tunniuppaat. Petrine aamma Inuuteq, tamarmik qulingiluanik ukiullit Kunngissap nulianut Marymut poortukkanik tunniussisuupput.
Ukkatarinninneq meeqqaniiginnarpoq, Borgmesteri Avaaraq Olsen tikilluaqqusilluni oqalugiarnermi naggasiinermini eqqaavaa meeqqat piumassuseqarluarnerat siunissami ingerlatiinnassagaat neriuutigalugu.
“Innuttaasut inuusunnerusortagut illoqarfitsinni saliinermut peqataarusussuseqarnerat takullugu nuannerpoq. Neriuppunga pikkorittuunersi attatiinnassagissi, aamma pinngortitamik paarsilluarnissamut inuusuttuaraqatisi isumassarsitissimassagasi neriuutigaara”, Avaaraq Olsen naggasiivoq.
Pinngortitaq pillugu nunarsuaq tamakkerlugu suliniaqatigiiffik, WWF-imeersoq Allan Olsen oqalugiartuni kingullersaalluni naggasiivoq. Oqalugiartoqareermat meeqqat nuannaaqisut sialussiutitik gummitillu ateriarlugit Kunngisap nulia Mary aammalu Borgmesteri Avaaraq Olsen sialuup ataani eqqakkanik katerseqatigivaat.
(Photocredit: Christian Klindt Sølbeck)
