Allanngoriartornissamik sivisuumik suliniartoqareersorlu siullermeerluni alloriartoqarpoq, tamanna pivoq USK-imi, ASK-imi kiisalu atuarfiup kingorna ornittakkani Illumi aammalu Narsarmiutami sulisut ulluni marlunni kattunnissaq siunertaralugu kiisalu ataatsimoorussassamik sulinermi pissusissamik pilersitsinniarlutik Hotel Hans Egedemi naapimmata. Ilinniartitsisut naapertorlugit ullut taakku eqqaamaneqartussanngorput USK aamma ASK ataatsimuulerfiattut.
Atuarfissaq 2024-mi piareerpat pisussaq annertuujusussaavoq, atuarfittaassammi atuarfiit Ukaliusaq (USK) aamma Atuarfik Samuel Kleinschmidt (ASK) taarsertussavai. Taamaattumik tupinnanngitsumik USK-imi ASK-imilu ilinniartitsisut pissanngatigivaat atuarfimmi taamak angitigisumi sulilernissartik.
”Ulluni marlunni ilinniartitsisut piumassuseqarluarlutik peqataanerat nuannaarutigaara. Isorineqarsinnaasut maluginiarpaat taakkunanullu aaqqiissutaasinnaasunik tikkuussisarlutik, taakku suleriaqqinnitsinni atorluarsinnaavagut. Malugineqarsinnaavoq ilinniartitsisut qilanaartut, sinaakkutit inillu nutaaliaasut periarfissagissaartullu atorluassallugit, aamma immikkut mianersuutigaat USK-inngorsaanaveersaarnissaaq imaluunniit ASK-inngorsaanaveersaarnissaq. Illinniartitsisunit meeqqat ilorrisimaartinneqarlutik atuartinneqarnissaat ukkatarilluinnaraat aamma attortinnanngitsuunngilaq, naak ulluni makkunani sulisut sulinerminni pissusissaminnik sammisaqaraluartut”, ineriartortitsinermi pisortaq Jill Raarup-Hellesen oqarpoq.
Jillip ilutigalugu oqaatigaa suliniarnerup ingerlanerani atuartut pillugit immikkut ukkataqarlutik suliaqarumaarlutik, tamanna aamma atuarfiup atuutilinnginnerani pissasoq oqaatigalugu.
”Naak suli ukiut marluk ingerlasussaagaluartut atuarfiup ammarnissaanut, malunnarluinnarpoq atuarfittaassami sulilernissamut piareersarluarnissaq ilinniartitsisunit pingaartinneqartoq”, Jill Raarup-Hellesen oqarpoq.
Isummanik paarlaateqatigiilluartoqartoq
Paarlaateqatigiittoqarluarsimanera peqataasunit arlalinnit naqissuserneqarpoq. Ullut marluk tamarmik aallartinneranni peqataasut nalaatsortumik issiavissaannik inissinneqarput, taamaasillutik akulerisimalluarput sulisullu assigiinngitsunit aggersut oqaloqatigiinnissaat anguneqarluni.
”Misilittakkanik isumassarsianillu paarlaateqatigiinneq ippassaq ullumikkullu pipput, tamanna pissangarsimavoq. Ulluinnaat suliffiusut ASK-imi qanoq ingerlasanersut tusarfigissallugu pissanganarsimavoq”, USK-imi ilinniartitsisoq Hilda Pedersen oqaluttuarpoq.
Suliniuteqarneq suli ingerlassaaq, atuaqatigiiaanik atuartitsinermi ilinniartitsisunit ataqatigiissaarinissaq qanoq ingerlasinnaanerani immikkut ukkatarineqassalluni.