Kommuneqarfik Sermersuumi Suliffeqarnermut Isumaginninnermullu Ingerlatsivimmi pisortaasimasoq, Isak Nielsen Kleist, 66-inik ukioqarluni toqukkut qimaguppoq.
Isak Nielsen Kleist ukiuni marlunni, 2018-miit 2020-mut Kommuneqarfik Sermersuumi sulivoq, kingorna Inuussutissarsiornermut Naalakkersuisoqarfimmi pisortanngorpoq.
Suliffeqarnermut Isumaginninnermullu Ingerlatsivimmi suleqataasa Isak Nielsen Kleist tatiginartutut, siunnersuutinik tigusinissamut ammasutut aammalu suleqatinik innuttaasunillu oqaloqateqarnissamut piareersimajuaannartutut eqqaamavaat. Isak Nielsen Kleist pisortaanermini innuttaasunik kiffartuussinerup pitsanngorsarnissaanik kiisalu suliffeqarfimmi sulinermi naammassisaqarluarsinnaanerulernissamik suliniuteqarsimavoq.
Vicekommunaldirektør Marie Fleischerip eqqaamavaa Isak Nielsen Kleist suleqataasoq nuannersoq tunniusimasorlu, inuk kissalaartoq aammalu pisortaqatigiit akornanni kommunimilu tamani suleqatigiilluarnermut tunniussilluartartoq.
Isak Nielsen Kleist qimatarai nuliani, qitornani marluk ernuttanilu marluk.