Meeqqamut nuanninngitsumik nalaataqarsimasumut angajoqqaajusoq, Inuusuttunik Sullissivimmiit suleqateqarluarnini nuannaarutigaa.
Qitornaasoq ukioq 2021-mi tarnip pissusaanik ilisimasallimmik oqaloqateqartalerpoq. Naak tamanna qitornaasumut iluaqutaagaluartoq anaanaasoq suli ikorfartorneqarnissamik pisariaqartitsivoq.
”Kisermaajuvunga, taamaammat ullut ilaanni assoroorsinnaasarpunga. Qitornamma oqaloqatiginiartarnera ajornarsinnaasarpoq matupallattarami, kisianni malugisinnaavara Inussuttunik Sullissivimmiittarnera iluaqutaajartuaartoq”, angajoqqaaq oqaluttuarpoq.
Anaanasoq oqaluttuarpoq qitornaasoq Inuusuttunik Sullissivimmi oqaloqateqartartoq. Qitorni ulluinnarni sammisassaqartuarnissaa pisariaqartikkaa isumaqarpoq.
”Allamit tapersersorneqarnissaa aamma pisariaqarpoq, uanga tapersersortuarpara, kisianni ullut ilaanni ”qatsussinnaasaraminga”, taamaasilluta aporaateqqajaalersarluta. Taamaammat angerlarsimaffiup avataaniit, suliamik ilisimasaqartuniit pisariaqartitsisimavunga. Qujanartumillu ”Sapiik”-mut ilanngunneqarpoq”, angajoqqaaq oqaluttuarpoq.
Qitornaasoq suliniummi ”Sapiik”-mi ulluinnarni peqataasarpoq. Tassani inuusuttuaqqat Inuusuttunik Sullissivimmiit siunnersortit peqatigalugit sammisaqaqatigiisinneqartarput. Asimiinneq, suliffeqarfinnut ilinniarfinnullu pulaarnerit, aallaarsimaarnerit, misigissutsinik oqaasinnguinerit assigiinngitsorpassuarnillu sammisaqartarlutik. Qitornaasup inuusuttoqatiminik aammalu inuusuttunik siunnersuisunik avatangiiseqarnera iluaqutaasoq anaanasup oqaluttuaraa. ”Sapiik”-lu saniatigut Inuusuttunik Sullissivimmik ulluinnarni aamma anaanasoq suleqateqarluartarpoq.
”Ukioq kingulleq qimaasalerluni aallartippoq. Oqarasuaataa atorlugu sumiissusersisinnaasarpara, taannali internetsimut attaveqaqqaarluni atorsinnaasarpoq. Sumiiffeerukkaangakku Inussuttunik Sullissivimmut attaveqartarpunga, ilaatigullu ikiorsinnaasarpaanga, taakkumi inuusuttunik allanik aamma attaveqarluartuummata”, angajoqqaaq oqaluttuarpoq.
Anaanasoq aamma oqaluttuarpoq ilaanni Inuusuttunik Sullissivik aqqutigalugu qitorni Toqqissisimanissaq pillugu biilinik angalasartunit aatissinnaasarlugu. Toqqissisimanissaq pillugu biilinik angalasartut tassaapput kommunimit pilersinneqarsimasut, taakkulu Inuusuttunik Sullissivimmit ingerlanneqarput, unnuakkut illoqarfimmi biilerlutik angalaartarput, meeqqat inuusuttut paariniarlugit aammalu taakku pisariaqartitaat naapertorlugit siunnersuisarlutik.
Ilanngullugu oqatigaa qitorni aalajangersimasumik siunnersortimik tulaaveqarsimasoq, maannakkulli aamma allanik tulaveqariartortoq oqaatigalugu.
”Inuusuttunik Sullissivimmik suleqateqarnera nuannaarutigeqaara, malugisinnaagakku qitornannut uannullu iluaqutaasoq”, angajoqqaaq oqaluttuarpoq. Angajoqqaaq aamma oqaluttuarpoq qitornaasoq Sapiik-miinnera naammassinissaanut iliuusissamik pilersaarusiulereersimallutik.
Inuusuttunik Sullissivik
Nuummi Inuusuttunik Sullissivik meeqqanut inuusuttunullu 6-iniit 23-t angullugit ukiulinnut assigiinngitsutigut immikkut ikiorsiinissamik neqerooruteqarsinnaavoq. Ajornartorsiutaasoq apeqqutaatillugu inuusuttoq neqeroorutit assigiinngitsut aamma sakkussat assigiinngitsut atorlugit ikiorserneqarsinnaavoq. Sullissivik, immikkoortoq apeqqutaalluni, ulluinnarni 07:00 – 22:00-llu akornanni ammasarpoq, inuusuttup piffissami tassani ikiorserneqarnissamik pisariaqartitsiffiani qulakkeerissalluni.
Inuusuttunik Sullissiviup neqeroorutigai:
- Meeqqanik 6 -14-inik ukiulinnik sakkortuumik nalaataqarsimasunik katsorsaaneq.
- Inuusuttunut 10 – 18 ukiulinnut inuttut, ilaqutariittut, inooqataanikkut imaluunniit ilinniagaqarnikkut unamminarsinnaasunik tunngasunik inuusuttunik siunnersuineq.
- Inuusuttunut 18-23-nik ukiulinnut malitseqartitsineq.
- Inuusuttunut 23-t tikillugit ukiulinnut aanngajaarniutinik katsorsaaneq
- Ammasumik kinaassutsimik isertuussisumik inuusuttunut siunnersuineq Nuummi inuusuttunut tamanut angajoqqaavinullu neqeroorutaavoq.
Nuummi Inuusuttunik Sullissivik pillugu uani paasisaqarnerusinnaavutit