Tasiilami ilaqutariit 13-it 2022-mi juuni qiteqquttaq tunngaviusumik pikkorissartinneqarput, taamalillutik paarsisuunissamut akuersissummik allagartaqalerlutik. Pikkorissarnermi qulequttat assigiinngitsut arlaqatut sammineqarput. Angajoqqaarsianut ilitsersuutit, oqartussanik suleqateqarneq, meeqqat angajoqqaaminniit avissaartinneqaraangamik qanoq qisuariartarnersut ilaatigut sammineqarlutik.
Ilaqutariit 13 paarsisuunissamut akuersissummik allagartartaarniarlutik tunngaviusumik pikkorissarneqarput. Ilaqutaariit psykoterapeutimit, Elisabeth Willemit pikkorissarneqarput. Pikkorissaanerullu ingerlanerani angajoqqaarsianut siunnersortit Martha Brandt aamma Olga Maratse malinnaapput.
”Angajoqqaarsiat tamarmik tunngaviusumik pikkorissartussaapput, taamaammallu nuannaarutigaarput ilaqutariit 13-it tunngaviusumik pikkorissarnertik naammassimmassuk”, Meeqqanut Ilaqutariinnullu katsorsaanermik immikkoortortaqarfimmi aqutsisoq Gerda Fleischer unnersiorpoq.
Angajoqqaarsiat pikkorissarnerminni assigiinngitsorpassuarnik sammisaqarput. Ilaatigut saqqummiunneqartut ukuullutik; angajoqqaarsianut ilitsersuutit aammalu pisortanik suleqateqartarnerit, isiginnaagassiaq ”Meerarsiaalluni inuuneq” takutinneqarluni, qanigisanik tigummiaqartarnermi eqqumaffissat, mediterernerit allarpassuillu.
Pikkorissarnermi peqataasut ilaat, Emilie Sanimuinaq oqarpoq pikkorissarnermi pissarsiaqarluarsimalluni.
”Pikkorissarneq pissarsiaqarfioqaaq. Pikkorissarnissamut neqeroorfigineqarama eqqarsarsimagaluarpunga ”Sooq kursuseqqissaanga?”. Kisianni qujaqaanga pikkorissarnermut peqataasimagama. Pikkorissaqataasut allat misigisanik avitseqatigisinnaallugit nuannerpoq, aamma pikkorissaasoq Elisabeth Wille pikkorissaalluaqaaq, suliaminik ilisimasaqartorujussuuvoq tunniussassaqarluarlunilu, qujamasuppunga pikkorissarnermut peqataasinnaagama.
Pikkorissaasoq Elisabeth Wille aamma misigisimavoq pikkorissaaneq pissarsiaqarluarfiusoq.
”Peqataasut tamarmik tunniusimapput. Ilaqutariit iluani aaqqitamik meeqqanik tigusisimasut aamma ilaatinneqarmata nalunaarsorneqalersimammatalu pitsaasutut isigaara. Aamma misigisimavunga suliaq pingaarutilik ilaaffigalugu”, Elisabeth Wille oqarpoq.
Angajoqqaarsianngornissamut soqutiginnippit? Taava uani paasisaqarnerugit