Services

Isumasioqatigiinneq pissarsilluarfiusoq

Isumasioqatigiittoqarnerani uummaarilluartumik oqaloqatigiittoqarpoq, isummannik paarlaateqatigiiffiulluni minnerunngitsumillu sulerusussuseqarnermi anersaaqartoqarluni. Isumasioqatigiinni ulluni marlunni ingerlanneqarpoq, ulloq siullermi innuttaasut oqariartuutaat, politikkikkut anguniakkat kiisalu kommunimi suliniutit killiffii eqqartorneqarput. Ullut aappassaanni Nunaqarfinnut pilersaarut kiisalu nunaqarfinnut aningaasaliissutit sammineqarput.

Kommunalbestyrelsemut nunaqarfinnullu aqutsisunik ukioq kingulleq qinersisoqareerneranni isumasioqatigiinneq siulleq ingerlanneqarpoq. Nunaqarfinni aqutsisuni kiinnat ilisarnartoqarpoq, nutaanilli aamma peqarpoq, taamaattumik ilaannut isumasioqatigiinneq nutaajuvoq. Naak borgmesterip Charlotte Ludvigsenip nunaqarfinni aqutsisut siulittaasui oqaloqatigillattaasaraluarai, nunaqarfinni aqutsisut naapinnissai borgmesterimut pingaaruteqarpoq.

Najukkami innuttaasut aalajangiisuupput

Isumasioqatigiinnerup ulluani siullermi innuttaasut oqariartuutaat aammalu politikkikkut anguniakkat sammineqarpoq. Isumasioqatigiittoqannginnerani nunaqarfinni aqutsisut innuttaasunik ataatsimiititsisimapput, tassani qulequttat pingasut eqqartorneqarsimallutik.

  • Nunaqarfimmi ingerlalluartut pingasut
  • Nunaqarfimmi unammillernartut pingasut
  • Nunaqarfik inuummarissarniarlugu suut suliarineqassappat?

Kommuneqarfik Sermersuumi nunaqarfiit arfineq-pingasuupput sisamanillu nunaqarfinnut aqutsisoqarluni, nunatta kangianeersuullutillu kitaaneersuullutik. Taamaattumik nunaqarfinni pissutsit iluatsittut unammillernartullu nunaqarfimmiit nunaqarfinnut assigiinngiiaarlutik. Assersuutigalugu nunaqarfiit ilaanni peqatigiiffilerineq iluatsittoq ilaanni unammillernartumik inissisimasinnaavoq aamma ilaat sukisaarsartarfeqartoq allat peqanngitsut.

”Nunaqarfinni pissutsit ilisarisinnaalluarpakka. Kommunerput angisoorujussuuvoq, pissutsillu assigiinngitsorujussuullutik. Taamaammat unammillernartut aaqqiivigineqarnissaannik nunaqarfinni innuttaasut, nunaqarfinni aqutsisut uagullu kommunalbestyrelsemi issiasut suleqatigiilluarnissarput anguniartuartariaqarparput. Nunaqarfinni innuttaasut taakkuupput unammillernartut suuneranik ilisimasaqarnerpaat. Taamaattumik isumasioqatigiittarnerit pingaaruteqartupilussuupput, taamaasilluta suliniutigut suleqatigiinnikkut ataqatigiissarsinnaaniassagatsigit”, borgmester Charlotte Ludvigsen oqarpoq.

Nunaqarfiit aqutsisuisa peqatigiiffianni KANUNUPE-mi siulittaasoq Ove Villadsen isumasioqatigiinnermi aamma peqataavoq, taanna borgmesteri isumaqatigaa.

”Isumaqarpunga uummaarissumik aammalu peqataasut piviusorsiortumik oqallinnerat torraasorujussuusoq. Nunaqarfimmi anguniagaat assut pissanganarput aammalu soqutiginarlutik. Nunaqarfinni aqutsisut pimoorussinerat nuannarigakkit oqaatigissavara”, KANUNUPE-mi siulittaasoq Ove Villadsen taama oqarpoq nangillunilu;

”Isumasioqatigiittarnerit ingerlanneqartarnerat pingaartorujussuuvoq, pissutigalugu politikkikkut ingerlatsiniaraanni siunniussaqarsimagaannilu taava aalajangiussaq angunissaata tungaanut qimannaveersaarneqartariaqarpoq. Taamaattumik nunaqarfinni aqutsisut anguniakkatik, nunaqarfinnut iluaqutaasussat, aaliangiussimallugit qimannaveersaarlugillu ingerlassasut neriutigaara. Pingaartorujussuuvoq taamatut naapittarneq (isumasioqatigiittarneq), nunaqarfimmiut tamakkerlugit peqataatinneqarnerat.”

Isumassarsianik paarlaatseqatigiinneq

Isumasioqatigiinnerup ulluisa aappaanni Nunaqarfinnut Pilersaarut aammalu aningaasat nunaqarfinnut atugassat eqqartorneqarput. Tassani nunaqarfinnut aqutsisut politikkikkut anguniakkatik allattorpaat, taakkulu kommunalbestyrelsip nunaqarfinnut pilersaarutit pillugit suliaqalerpata atorneqartussaapput.

Tassani nunaqarfiit tamarmik immikkut anguniagaat oqallisigineqarput. Kissaatit assigiinngitsut saqqummiunneqarput, qinikkaniit atorfilittaniillu tikeraarneqarnissamik kissaatiniit paaqqinnittarfinni neqeroorutit pitsaanerulernissaannut aammalu sukisaarsartarfinni sulisunut pikkorissaanissaanut kissaatit, iliveqarfimmik nutaamik aammalu arsartarfiit pitsanngorsarneqarnissaat saqqummiunneqarlutillu oqallisigineqartut ilagaat.

Politikkikkut anguniakkat aammalu Nunarfinnut Pilersaarut 2022-2025 sammineqareermata aningaasat nunaqarfinni atugassat oqallisigineqarput. Tassani kulturimut immikkoortortaq nunaqarfinnut aningaasaliissutit qanoq atorneqarsinnaanerinik isumassarsianik nunaqarfinni aqutsisunit atorluarneqarsinnaasunik saqqummiipput. Saqqummiisoqareermat eqimattakkaarluni eqqartuisoqarpoq, tassani nunaqarfinni aqutsisut nunaqarfimminni aningaasaliissutit qanoq atortarnerlugit kiisalu siunissami qanoq atorsinnaanerlugit allattuisinneqarlutik. Tamanna isumassarsiarnik allatuinermik inerneqarpoq, nunaqarfiit isumassarsiaminnik parlaasseqatigiissinnaanngorlugit.

”Tamassi nersualaarusuppassi. Oqallilluarsimaqaasi isumassarsiarpassuaqarsimallusilu, taakkulu nunaqarfissinnut iluaqutaanissaat qularutiginngilara. Minnerunngitsumillu qujarusuppunga isumasioqatigiigiannginnissinni innuttaasunik ataatsimiititsisimagassi. Innuttaasut isumaat tusassallugit pingaaruteqartuaannarmat. Sulinersi uagutsinnut kommunalbestyrelsiniittunut minnerunngitsumillu nunaqarfimmioqatissinnut nalituupilussuupput. Maanna nunaqarfissinnut angerlarlusi suliartulerpusi. Tikeraarlunga pulaalerussi suliarisimasasi pitsaasut takunissai qilanaaraakka”, Charlotte Ludvigsen naggasiivoq.

Kommualbestyrelsi aggustimi Nunaqarfinnut Pilersaarut suliarilerpassuk isumasioqatigiinnermi imaqarniliat tamarmik kommunalbestyrelsimut saqqummiunneqarumaarput.