Aningaasartuutissat nutaat matumani pineqanngillat – pitsaanerusuminguna aningaasalersuinissaq pineqaannartoq
Nuup qeqqani nunatsinni meeqqat atuarfiisa annersaat sananeqarpoq. Ukiut marluk qaangiuppata atuartut siulliit atuarfik atulissavaat, taamaalillutillu nunatsinni atuartitsinermi atugassarititaasut nutaaliaanerpaat iluaqutigilissallugit. Meeraaqqeriviit nutaat, illoqarfiup qeqqaniittoq aamma Nuussuarmiittoq atorneqalereerput. Ippassaq qatserisartoqarfik nutaaq nutaaliaasorlu atoqqaarfissiorneqarpoq.
Taakku tamarmik kommunalbestyrelsip isumaqatigiissup aalajangiinerata inerneraat. Kommunimi innuttaasunut atugassarititaasut pitsannguiffiginissaannut aki tamarmiusoq 1,2 milliarder koruuniuvoq.
NCD aallaqqaammut pisortat namminersortullu suleqatigiiffiat (OPP) aqqutigalugu suliassatut pilersinneqarpoq. Suliassani taakkunani suliffeqarfiit namminersortut sanaartukkanik aserfallatsaaliuisussaapput aningaasalersuisussaallutillu. Kisiannili suliffeqarfinnik suleqatigiinnermut peqataarusuttunik nassaarneq ajornarsimavoq.
Tamatuma peqatigisaanik Kalaallit Nunaanni kommunit aningaasanik taarsigassarsisinnaanerat pitsaanerulersimavoq. Tamatuma kingunerisaanik najoqqutassiami NCD illunik sanaartortinniarneqarnera, tamatumalu kingonra kommunimut attartortitsiniarneqarnera isumaarussimavoq.
”Aallaqqaammulli OPP-p periarfissaanngitsoq ilisimasuugutsigu, aningaasanik namminneerluta taarsigassarsinissarput, aammalu illoqarfiup ineriartortinnissaanut ingerlatseqatigiiffiup sipaarniuteqarnermi peerneqarnissaa aallaqqaammulli toqqarsimassagaluarparput. Taamaattumik maanna aningaasaliissutissanik akikinnerpaanik pissarsiniartussanngorpugut. Taanna torersaanernut, innuttaasunut iluaqutaasussamut ingerlasunut assersuutissaavoq”, Kommuneqarfik Sermersuumi borgmesteri Charlotte Ludvigsen oqarpoq.
Illuliassat ullumikkut NCD-mi ingerlanneqartut tamakkerlutik 1,2 milliarder koruuninik akeqarput. Aningaasat sanaartukkanut suli naammassineqanngitsunut tunngasuupput, kisiannili aamma sanaartukkanut NCD aqqutigalugu aningaasalersorneqartunut tunngasuupput, taanna aqqutigalugu kommuni akikinnerusunik maanna taarsigassarsisinnaalermat.
Aamma borgmesteri erseqqissaavoq, aningaasalersueriaatsit nutaat kommunimi akisussaaffeqarnerusumik ineriartortitsinissamut qulakkeerissutaassasut.
”Atuarfimmik nutaamik meeqqerivinnilluunniit nutaanik sanaartornissamut utaqqisinnaanngilagut. Taamani kommunalbestyrelsi aningaasaliissuteqartoqarnissaanik aalajangiimmat tamanna utaqqisinnaasimanngilarput. Aningaasaliinerit akilikkagut tamarmik illoqarfimmi innuttaasunut pisariaqarput. Aningaasaliinissanut taakkununnga taarsigassarsisinnaanerput tamanut atugassarititaasut pitsaanerulernissaannik isumaqarpoq”, Charlotte Ludvigsen oqarpoq.
Aningaasat taarsigassarsianut akilersuinissamut atorneqartussat missingersuusiorneqareerput, tassalu illuni pineqartuni, kommunip siunissami pigiligassaanni ineqarnermut akiliutissatut ukiumut 75 millioner koruunit immikkoortinneqartassapput.