Naalakkersuisunut allagaq ammasoq:
Kommunalbestyrelsimi ilaasortat isumaqatigiittut Naalakkersuisunut kaammattuipput Tasiilap nunaqarfiini naqitsineq atorlugu imeqarfiliortoqassasoq. Kommunalbestyrelsimit isumaqarfigineqarpoq ukioq kaajallallugu imeqartarneq illoqarfinnuinnaq atuutsinneqassanngitsoq, tunngaviusumilli kiffartuussinermi tamanut atuutsinneqassasoq.
Ukiuni kingullerni nunarsuaq tamakkerlugu Coronap atuunnerani nunarsuarmiut eqqaasinneqarput ernup qaqorsaallu atorlugit eqqiluisaarnerup qanoq pingaaruteqartigineranik. Imeq qaqorsaallu virusinut bakterissanullu akiuussutissaapput pitsaanerpaat, taakku atorlugit asakkutta, uffarutta illumilluunniit eqqiaagutta.
Naalakkersuisunut taamatut kaammattuisoqarnissaa partiinit tamanit ilalerneqarpoq, pissutigalugu tamarmiullutik nunaqarfiit ataannarnissaat kissaatigigamikku, ataannartinneqarsinnaappullu nunaqarfinni innuttaasut inuuniarnikkut atukkanik naligiimmik pineqarunik, tamatumunngalu imermik kuuinnartumik peqarnissaq pisariaqarpoq. Taamaattumik Tasiilami nunaqarfiit ullutsinnut naleqquttumik imermik pilersuisoqalernissaanut Naalakkersuisut pilersaarusiussasut kommunalbestyrelsimi partiinit tamanit neriuutigineqarpoq.
Kommunalbestyrelsimi siunnersuuteqartoq, Mala H. Kuko, ima oqarpoq: “Nunaqarfiunngitsuni sumiiffinni allani tamani imeq kuuinnartuussasoq naatsorsuutigineqartarpoq. Maanna piffissanngorpoq kommunitsinni inoqutigiit tamakkerlutik kommunillumi tamarmik ilanngullugit imermik kuuinnartumik peqalernissaannut. Peqqinnartumik inuuneqalernissamut tunngaviuvoq pingaaruteqarluinnartoq. Taamaammat Siumumiit siunnersuuteqartuulluta Naalakkersuisut Inatsisartullu suliassaqarfiup pingaarnersiugaanissaanut kaammattuivugut.”
Inussiarnersumik inuulluaqqusillunga
Kommuneqarfik Sermersuumi Kommunalbestyrelse.