Partiit Inuit Ataqatigiit aamma Naleraq, kommunimut qinersinissap tullissaata tungaanut Kommuneqarfik Sermersooq ingerlanneqarnissaa isumaqatigiissutigaat. Isumaqatigiissutaareersimasumit aallaaveqarpoq, allannguuteqalaarlunili erseqqarinneruvoq.
”Isumaqatigiissut nutaaq isumaqatigiissutaasimasumut sanilliullugu pitsaaneruvoq erseqqarinnerullunilu, tamanna innuttaasunut iluaqutaasussaavoq. Ukiut tulliuttut pingasut suleqatigiinnissatsinnut qilanaarpunga aammalu kommunalbestyrelsemi siammasissumik suleqatigiilluarnissaq neriuutigalugu”, borgmesteri Charlotte Ludvigsen oqarpoq.
Isumaqatigiissut ilarujussua Inuit Ataqatigiit, Naleqqap Demokraatillu isumaqatigiissutigisimasaannit tunngaveqarpoq, taamaattorli isumaqatigiissut nutaaq nutaartaqarlunilu ersarissaanertaqarpoq, tamannalu ukiuni tulliuttuni pingasuni kommunalbestyrelsemi sulinissamut tunngaviliilluarpoq.
Ukiuni tulliuttuni arfinilinni inissianik 1.850-inik sanaartortoqarnissaa sulissutigineqarnera ingerlaannassaaq, isumaqatigiissummilu nutaami anguniakkat nutaat ilaatigut tassaapput; piniarneq, aalisarneq takornarialerinerlu ukkatarineqarnerulernissaa kiisalu Ittoqqortoormiuni inissianik aserfallatsaaliuinissaq aamma nutaanik sanaartornissaq.