Services

Silami utaqqisarneq unippoq. Talittarfiup Tidevandstrappenip eqqaani containeri atoqqillugu utaqqisarfinngorpoq

Nuummi innuttaasut amerlasuut Tidevandstrappenimi umiatsiap tikinnissaanut utaqqisarput. Misigisaq qiianarsinnaasoq siallertumilu pisinnaasartoq maanna unissaaq. Tassami Sikuki Nuuk Harbour aamma Kommuneqarfik Sermersooq ataatsimoorlutik containerimik atoqqiinikkut oqquiffissamik, kiassakkamik innaallagialimmillu peqarnissaa isumagisimavaat.

Nunarsuarmi imarpissuit arfineq-marluk angalaffigereerlugit maanna containeri siunertamut nutaamut atorneqalissaaq Tidevandstrappenillu eqqaani inissinneqarluni. Containeri maanna utaqqisarfinngortinneqarpoq kissassigaq, USB-nut immiinissamullu innaallagialik, taamaalilluni umiatsiaaqqanut ilaasartut utaqqinerminni atorsinnaassavaat.

Kikkut tamarmik nalunngilaat Kalaallit Nunaanni sila naatsorsuutigineqartuaannarsinnaaneq ajortoq, tamannalu pillugu talittarfimmi Tidevandstrappenimi utaqqineq sivikikkaluartoq sivisoorsuartut misinnarsinnaasartoq, pingaartumik siallertillugu, anorlertillugu imaluunniit issitillugu. Tamannali ernumassutigisariaaruppoq, containeri allanngortitigaq maanna utaqqisarfittut atuutilerneratigut.

”Kommunimiit umiarsualivimmiilu inuussutissarsiuteqartut tusaaniarneqarsimanerat attaveqaatillu pitsaanerulersinneqasimanerat, soorlu nutaamik utaqqisarfiliornikkut, nuannaarutigaarput. Taamaalilluni ilaasartugut qiiasassanngillat nuannernerusumillu misigisaqarlutik” Nuuk Water Taximit Anders Lykke Laursen oqarpoq.

Utaqqisarfiup pisatai atornikunik sanaajupput, containerillu silataa qisunnik kissassikkamik suliarineqarsimasunik aserfallatsaalisariaqanngitsunik qallersorneqarsimavoq, soorluttaaq qaliani seqerngup qinngorneranik nukissiuutitigut qaammaqquteqartinneqartoq. Saniatigut qisuk FSC-mik akuersissuteqarlunilu svanemærkeqarpoq.

Utaqqisarfik aallarnissaminnik utaqqisunut ilaasartunuinnaanngitsoq iluaqutaassaaq, aammali tikittartunut. Assersuutigalugu tikinnermi mobili battereerussimappat utaqqisarfimmi immersorneqarsinnaassaaq taxanullu inniminniilluni – anorimut silamullu oqquiutigaluni.