Umiarsuit takornariartaatit 15-it aasap ingerlanerani Paamiunut akunnittussaapput, umiarsuillu taakku katillugit 12.300-rujunik ilaasoqassapput. Paamiuni innuttaasut takornarianik tigusinissaminnut piareersimassapput, taannavorli pingaarnertut peqqutaasoq Sermersooq Business Paamiuniinneranut. Sermersooq Business Paamiunut tikeraarnermini illoqarfimmi suliffeqarfiit, kommunip ingerlatsiviit inuussutissarsiortullu oqaloqatigineqarput.
Umiarsuit takornariartaatit 15-it aasaru Paamiunut akunnippatta, Paamiuni innuttaasut takornariarianik tigusinissaminnut piareersimassapput. Taamaammat suliffeqarfik namminersortoq takornarianik sullissisartoq Tupilak Travel Sermersooq Business peqatigalugu Paamiuniissimapput, Paamiuniinneranni meeqqat atuarfiat, Majoriaq, kommunip ingerlatsivii, inuussutissarsiortut kiisalu Inuussutissarsiornermi Siunnersuisoqatigiit oqaloqatigineqarsimapput.
Paamiuni nukiit piginnaasallu pigineqartut aallaavigalugit najukkami pilersitsinerit iliuseqarnerillu Sermersooq Businessimiit tapersersorneqarput. Taamaammat Paamiuni innuttaasut naapinneqarneri iluarineqarpoq. Taakkuummatami takornarianik tigusisussat, Sermersooq Businessimiit oqariartuutigineqarpoq.
Paamiuni martsip 19-iani 2022-mi innuttaasunik ataatsimiisitsisoqarmat borgmesteri Charlotte Ludvigsen Paamiuni innuttaasunut kaammattuuteqarpoq.
”Aasaru takornariat 12.000-it akunnittussaapput, taamaammat sanaluttarussi, nuersaasarussi imaluunniit assigisaanik suliaqartarussi, taava tuniniarsinnaasassinnik suliaqalereertariaqarpusi”, borgmesteri Charlotte Ludvigsen Paamiuni innuttaasunut kaammattuivoq.
Paamiuni innuttaasut sanalukkaminnik nunat allaneersunit tikeraanut tuniniaasinnaanissaat periarfissaassaaq, tuniniaaniartummi timersortarfissuarmi tuniniaasinnaanissaat periarfissiunneqarpoq. Tupilak Travel februaarimi Paamiut takornariartitsinermik pikkorissaavoq, tassanilu innuttaasut piumasut tamarmik periarfissinneqarlutik, pikkorissaanerlu majimi malitseqartinneqarnissaa pilersaarutaavoq.
Taamaammat Sermersooq Businessiminngaanniit neriuutigineqarpoq pikkorissaanissaq innuttaasuniit tigulluarneqassasoq, pikkorissarnermiillu ilikkakkat atorlugu aasaru takornarianik takornariartitsiumaartut.