Services

Nuummi Apummik Ilusilersuineq 2022-mi ajugaasut toqqarneqarput

Ulluni sisamani sulineq ippassaq nal. 15.00 naammassineqarpoq, “But Baby It’s Cold Outside” Nuummi Apummik Ilusilersuineq 2022-mi ajugaasutut toqqarneqarmat. Aappaatut toqqarneqarpoq “Woodchoppers”, taavalu “Art School” pingajuattut toqqarneqarluni. Takuniaasimasunit toqqarneqartoq tassaavoq “Team Kigutit”.

Inuppassuit Nuutoqqamukaasimapput, tamaani holdit 15-it ulluni sisamani tamarmik immikkut apummik ilusilersuimmata. Dommerit pingasut Peter Barfoed, Ivínguak Stork Høegh aammalu borgmesteri Charlotte Ludvigsen ilusilersukkanik naliliisuupput nalilersuutit sisamat najoqqutaralugit, eqqumiitsuliatut pitsaassuseq, assassornikkut qanoq innera, isumassarsiaq/oqariartuut aammalu apummik atorluaaneq.

Nuummi Apummik Ilusilersuineq 2022 pisortatigoortumik naammassereeraluartoq, ilusilersukkat kusanartut tamanit takusarneqartaannarsinnaapput, tallimanngorneq marsip 11-ata tungaanut.

Ajugaasut tassaapput “But Baby It’s Cold Outside”

Dommerit ajugaasutut siullertut toqqaanerminni tunngavilersuutigaat ilusilersorneqartoq eqqumiitsuliatut annertuumik naleqarmat, nutaaliorsinnaanermut ilusilersugassallu annertussusaa atorluarneqarneranut. Ilusilersukkap sammisaa tassaavoq eqqissineq, ullutsinnut naleqqulluinnartoq.

Aappaatut toqqarneqarpoq “Woodchoppers”

Dommerit “Woodchoppers” toqqarneranut tunngavilersuutigaat aput taavalu orpik atortussatut atorneqarneri imminnut ataqatigiilluarmata. Ilusilersugaq ataqatigiilluarpoq, oqariartuutaalu orpippassuarni pisuttuarnermi meditererneq takuneqarsinnaalluni.

Ajugaasut pingajuattut toqqarneqarpoq “Art School”

Tunngavilersuutigineqarpoq ilusilersukkap oqariartuutaa kikkut tamarmik oqaaseqarsinnaatitaanerat. Ilusilersukkap ilitsoqqussat pinngortitarlu taavalu illoqarfik ineriartornerlu ataqatigiisippai. Ilusilersugaq illua-tungaani angutaavoq aappaanilu arnaalluni.

Kiisalu takuniaasimasunit toqqarneqarpoq “Team Kigutit”.

Takuniaasimasut toqqagaat taasititsinikkut nassaarineqarpoq.

Ukioq manna apummik ilusilersuisoqarnerani takuniaasimasorpassuarnut qujanaq. Ukiup tullissaani Nuummi Apummik Ilusilersuisoqarnissaanut qilanaalereerpugut.

Nuuk Snow Fest 2023 pissaaq ulluni 2.-5. Marts 2023.

Nuummi Apummik Ilusilersuineq 2022 ukunannga aningaasaliiffigineqarpoq Kommuneqarfik Sermersooq – aningaasaateqarfik Sermeq, Nuummi Najukkami Ataatsimiititaq – Nuuk Lokaludvalg, Brugseni Nuuk, U.S. Consulate Nuuk, GrønlandsBANKEN, Nuuk Water Taxi, Royal Greenland , Vinslottet Grønland, Qiviut ApS, Stark Nuuk, SIKUKI Nuuk Harbour, Milik Publishing og Cafe Toqqorfik