Ukioq kingulleq naajartulersoq Kommuneqarfik Sermersooq allaanerusumik apeqquteqarfigineqarpoq, Mærsk-ip umiarsuaani assit nunarsuaq tamakkerlugu umiartortinneqarsinnaanersut pillugu.
Saaffiginnittuuvoq angallatip naalagaa Marius C. Costea, taamanikkut Shanghai-imiilluni umiarsuarmi nutaami naalaganngoriartortoq – umiarsuaq containerinik assartuisartoq Nuuk Mærsk.
“Tulluusimaarlutalu nuannaarutigeqaarput, umiarsuatta illoqarfissi kusanartoq ateerisinnaammagu,” Marius Kommuneqarfik Sermersuumut saaffiginnikkami oqaluttuarpoq, Taanna isumaqarpoq, Nuuk Mærsk assinik illoqarfimmit ateerisaminit kusassarneqartariaqartoq.
Kommune assinik tunniussaqarsinnaasimanngilaq, Mariusilu kaammattorlugu Nuummi assiliisartunut saaffiginnissasoq, tamannalu kusanarluinnartumik kinguneqarpoq. Maanna Nuuk Mærsk assinik illoqarfiup ilisarnaataanik kusanartunik ulikkaarpoq, ilaatigut Nuutoqaq, Sermitsiaq aamma arsarnerit. Allaaserisami uani assit ilaannanngui takutinneqarput.
Umiarsuaatileqatigiiffik aappassaanik umiarsuaatiminut Nunatsinni illoqarfiit pingaarnersaat atsiuppaa. Nuuk Mærsk containerinik 2.200-nik usisinnaavoq.
