Thula (Tulla) Louise Sofie Andreassen Dronningip nersornaasiuttagaanik decembarimi pinnappoq. Ilami 1975-imi aggustip aallaqqaataanili Tasiilami Alivarpimi ilinniartitsisutut sulisimagami, tamannalu isumaqarpoq aasaq atorfeqarfimmini ukiut 46-rut tikillugit sulisimasoq!
Oqaaserineqartut: “Maannakkut pisussaq, tassaavoq siullerpaammik, aatsaavissuaq aamma kingullerpaammik pisoq – inuttaanullu aamma siullerpaammik, aatsaavissuaq aamma kingullerpaammik pisussaavoq”. Oqaatsit taakkua oqaatigineqareermata, Tulla Andreassen Tasiilami Alivarpimi naalakkaminiit, pisortaminiillu, Jørn Holbech, Dronningip nersornaasiuttagaanik tupigutsannartumik tunineqarpoq.
Decembarip 17-iani gløggitorujuujutaa nuluusartorujuutaalu suleqatit peqatigalugit ilorrisimaarujoornermi juullernissaanut naggataarnersiornermi, tunniussineq pivoq. Tunniussineq ingerlattussaariarmat Tullap nalusaanik ilaqutai Tasiilami najugallit qaaqquneqarput. Ilaqutai Tasiilamiinngittut oqarasuaatikkut ilaapput, ilami ulloq taanna tamanut, ingammilu Tullamut, pingaaruteqartuummat.
Tulla ilinniartitsisuunera saniatigut aamma atuagaateqarfimmi atorniartitsisutut naalagaanikuuvoq tassami atuarfimmi atuagaateqarfigilerisutut aamma ilinniarnikuugami. Ukiut qulit sinnerlugit aamma atuarfimmi pisortap tulliiatut atorfeqarnikuuvoq, taannali 2008-mi nammineerluni unitsinnikuuvaa. Tulla atuarfimmi sunniuteqarnikooqaaq, ingammik ukiorpaaluit ilinniartitsisuunikuunerani meeqqanut atuartitarinikuusaanut sunniuteqarnikuullun ukiummi 46-rut ingerlanerani atuartissimasai amerlasimassaqaat. ulla aamma ukiut 25-it sinnerlugit Gentoftemi aamma Tasiilami ilinniartunik paarlaateqatigiinnerat akisussaaffiginikuuvaa. Taanna paarlaateqatigiinneq ukiut tamaasa Prinsesse Benediktemut naapeqatigiisitsinermik naggaserneqartarpoq.
Naak, Tulla 73-liisussaagaluarluni atuarfimmi aqutsisoqatigiimmi suli ilaavoq, aamma Tulla sunniisinnaanini atortuaannarpaa. Tulla inuuvoq akisussaassuserminik pingaartitsisoq, nuannarineqartoq aamma sulisutut tatiginartuulluni, tamanna atuarfiup iluanaarutiginikooqaa.