Nina Rahbek Nuummi uumasunut iliveqarfeqalernissaanik innuttaasunut peqataatitsivik Kommuneqarfiga aqqutigalugu siunnersuuteqarnikuuvoq. Tamanna sukkasuumik innuttaasut akornanni taperserneqarpoq kommunalbestyrelsimullu ilaasortatsinnut ingerlateqqinneqarluni. Politikerit siunnersuummut akuersissuteqarmata aningaasartassai nassaarineqarput, innuttaasut peqataalluarnerat borgmester Charlotte Ludvigsenip nuannaarutigaa.
”Nuannaaqaanga paasigakku politikerit siunnersuutiga akuersissutigisimagaat,” innuttaasutut siunnersuuteqartoq, maannakkullu siunnersuutaa aningaasassaqartinneqalersoq, Nina Rahbek, oqapoq. Aningaasartassaasa nassaarinerisa saniatigut, sumiiffissaa nassaarineqarpoq, tassaalluni Pisisseq Quassussuullu akornanni narsartaq manissoq.
Nuannaarneq aamma politikkerinut, siunnersuummut akuersisunut sunniuppoq.”Isumaqarpunga siunnersuutitsialaasoq aamma siunnersuuteqarnermi tunniusimasoqarnera qujamasuutigaara. Najukkami oqartussaaqataanermut tunissutaavoq annertooq, innuttaasummi siunnersuutaat piviusunngorsinnaasut tamassuma takutippaa”, borgmesteri Charlotte Ludvigsen oqarpoq.
Ajutoorneq iluaqutissanngortillugu
Nina oqaluttuarpoq, ilisimajuarsimallugu, inuit uumasuutimik iliveqarfissaannik ujartuijuartartut, amerlasuutigummi taakkua ilaqutariinnut ilaalluinnalertarmata. Nuanninngitsumillu ajutoornerup kingunerisaanik uumasunut iliveqarfiliortoqarnissaanik sulissutiginnikkumanera annertusineqarpoq, taamaasillutik uumasut ikuallaannarneqartarunnaarniassammata.
”Aasaq qatanngutima qimmia aportippoq toqussutigisaminik, qatanngummalu meerai aliatsalluinnarput, qimmertillu ilerusukkaluarlugu – kisiannili taamaasiorsinnaanatik. Taamanikkut aalajangerpunga arlaatigut iliuuseqarumallunga, aammami uanga nammineq asaqisannik qimmeqarama,” taanna oqarpoq.
Kommuneqarfigami tapersersuisorpassuupput
Nina Kommuneqarfiga attaveqarfigeriaramiuk innuttaasutullu siunnersuuteqarluni tapersersorluarneqarpoq. Ilaquttat ikinngutillu, aammalumi innuttaasut allat attaveqaatikkut Messengerikkullu tapersersuillutik allattarput. Taamaattumik innuttaasutut siunnersuut Kommuneqarfik Sermersuumi kommunalbestyrelsimut anngunneqarpoq, akuersissutigineqarlunilu.
”Allat aamma Kommuneqarfiga atorluassagaat innersuukkusuppara, arlaanik sumulluunniit tunngasunut. Assigiinngitsunik atorfissaqartitsivugut, aamma allat sunik pisariaqartitsinersut tusarusupparput. Isummavut oqaatigisinnaasariaqarpavut, aammalu politikerinut siunnersuutitsinnik nassiussinissatsinnut periarfissaqarpugut. Taamatut periarfissaqarnerput atorluartariaqarparput,” Nina Rahbek oqarpoq.