Qanittumi ilisimatinneqarpunga kommunimut pisussaaffimmik politikikkut akuersissutigineqartussaagaluamik akuersissutigineqarsimanngitsumillu atsiorsimallunga. Taamatut iliorsimavunga kommunaldirektøriusimasup kukkusumik ilisimatittarsimammanga sulianilu arlalinni Sanarfinermut Avatangiisinullu Ingerlatsivimmi pisortaasimasoq akulikitsumik peqatigalugu namminerisaminik iliuuseqartarsimammat.
Suut tamatumunnga tunngavigineqarsimanersut naluara, kisianni akuerineqarsinnaanngilluinnarpoq. Kommunaldirektøriusimasoq kiisalu Sanarfinermut Avatangiisinullu Ingerlatsivimmi pisortaasimasoq taakkorpiaat pissutigalugit Kommuneqarfik Sermersuumi suliunnaarnikuupput.
Ukiup affaata kingulliup ingerlanerani kommunip allaffeqarfiani kukkusumik ingerlatsinernik aaqqiagiinnginnernillu arlalinnik takussaasoqarpoq. Tamanna soorunami akuerisassaanngilaq, erngertumillu iliuuseqarfigineqassaaq. Tamanna ilaatigut sulisut taaneqartut politiinut tunniunneqarnerinik kinguneqarpoq.
Allaffeqarfimmi pissusissamisuunngitsut massakkut kommunimi pisortaqatigiit peqatigalugit pimoorullugit sulissutigaakka.
Qaqugukkulluunniit kommunalbestyrelsimut isertuusserusussimannginnera naqissuserusuppara. Ammasumik suleriaaseqarneq, tamat oqartussaaqataanerat pitsaasumillu pissusilersorneq assut pingaartitaraakka. Taamaattumittaaq kukkusoqarsimaneranut utoqqatserusuppunga, Kommunalbestyrelsimili kinguneqartitsissutissatut aalajangikkatta sakkortoreersut saniatigut annertunerusumik kinguneqartitsinissamut pissutissaqarsorinngilara.
Ullut tamaasa kommune sinnerlugu pappiaqqanik atsiugassanik amerlasuunik atsiortarpunga. Nalunngilara qanoq imaqarnersut suunersullu. Immikkuualuttortaali, inatsisitigut ataqatigiissutsit suliassaqarfiillu qaleriittut tamaasa ilisimanngilakka. Suliffeqarfimmimi 2 milliard koruuninik missinganik kaaviiaartitsiffiusumi taamaattoqarsinnaanngilaq. Taamaattumik uannut saqqummiunneqartut eqqortuunissaat tatigisariaqartarpara. Tamannalu suliani arlalinni pisimanngitsoq paasineqarpoq, taamaattumillu massakkut pappiaqqanik atsiunnginnanni paasissutissat pissarsiarisama tatigisinnaanissaat qulakkeerniarlugu, sakkortuumik kinguneqartitsisimavunga.
Naleqquttoqannginneranik paasisaqaraangama Kommunalbestyrelse ataavartumik peqataatittarpara. Inissitsiternerup kingorna suleqatigiilluarpugut, ullullu tamaasa kommune pitsanngorsarniarlugu sulivugut. Qularinngilluinnarpara suleqatigeeqqinnitsigut allaffeqarfiup qinikkallu akornanni tatigeqatigeeqqittoqalersinnaasoq, taamaalilluta innuttaasunut pitsaanerpaamik sullissisinnaassagatta.
Allaffeqarfik peqatigalugu torersaanissaq ingerlaqqinnissarlu suliassaraara. Nukikka tamaasa tassunnga atorusuppakka.
Charlotte Ludvigsen, Kommuneqarfik Sermersuumi borgmesteri