Ukioq manna Nuuk Nordisk Kulturfestivali sapaatiummat oktobarip 31-ani naggataamik ingerlanneqarpoq. Festivali Katuami tusarnaartitsinermik naggaserneqarpoq, tassani islandermiu Ásgeir pikkunartumik naggasiivoq. Festivali ullut sisamani ingerlanneqarnerani inuit 2500-it aaqqissuussani assigiinngitsuni najuussimapput.
Nuuk Nordisk Kulturfestivalip ulluni sisamani ingerlanneqarnerani kulturikkut aaqqissuussarpassuit neqeroorutaasimapput, taakkunanilu eqqumiitsuliortut nunat avannarlerneersut amerlasuut aliikkusersuisimallutik. Billetsit 1000-init ikinnerunngitsut aaqqissuussanut assigiinngitsunut tamanut atorneqarsinnaasut tunineqarsimapput, kisianni aamma aaqqissuussat arlaqartut akeqanngitsumik ingerlanneqarput. Assersuutigalugu meeqqanut inuusuttuaqqanullu akeqanngitsumik NUIF-imi tusarnaartitsinerit ingerlanneqarput, taakku tallimanngonermi arfininngornermilu ingerlanneqarmata agguaqatigiisillugit 300-it missaaniittut najuussimapput.
Taakku saniatigut meeqqat atuarfiini GUX-imilu aamma akeqanngitsumik aaqqissuisoqarsimavoq.
”Maanna Nuuk Nordisk Kulturfestivali naammassivoq. Nuanneqaat kulturikkut misigisassat neqeroorutigineqartut pitsaasut amerlammata. Innuttaasut eqqumiitsuliortullu amerlasuut qungujulasut najuuffigisinnaasanni naapippakka. Nuuk Issittumi illoqarfinni kulturikkut pingaarnersaanini Nuuk Nordisk Kulturfestivalip takutippaa”, Kommuneqarfik Sermersuumi borgmesteri Charlotte Ludvigsen oqarpoq.
Inuppassuit – Qujanaq!
”Nuannaaqaagut kulturikkut neqeroorutigineqartut inuppassuarnit tigulluarneqarsimammata. Festivalimi neqeroorutigineqartut inuppassuarnut tulluarsimammata peqataasorpassuaqarpoq. Aaqqissuussani arlalinni illu ulikkaangajavittarsimavoq, ikitsuaqqallu ingerlaqqiinnartariaqartarsimapput inissaqannginnertik peqqutigalugu”, Kulturimi Aaqqissuusinermilu immikkoortortami aqutsisoq Søren Würtz taama oqarpoq.
Ukioq manna festivalertoqarnerani inuit 130-it nammineq kajumissuseq atorlugu suleqataasimapput, taakku iluaqutaalluinnarlutik ikiuulluarsimapput.
”Uagut, Kommuneqarfik Sermersuup Kulturikkut Aaqqissuussinermilu immikkoortortaaniit nammineq kajumissuseq atorlugu ikiuuttorpassuarnut qujarujussuarpugut. Ilutigalugu aningaasaliisorpassuarnut aamma qujavugut, immikkut NunaFonden taallugu taakkua Kalaallit Nunaanni eqqumiitsuliortut ataatsimoortinnissaannut piviusunngortitseqataammata. Nammineq kajumissuseq atorlugu ikiuuttoqartinnagu kiisalu aningaasaliisoqartinnagu Nuuk Nordisk Kulturfestival piviusunngorsinnaanngilaq”, Søren Würtz naggasiivoq.