Suliffiit pillugit nittarsaassineq 2021-mi Århusimi Københavnimilu ingerlanneqartuni Kommuneqarfik Sermersooq kommunimi sulisunik pingasunik ilaatitaqarneratigut aallartitaqartinneqarpoq.
Suliffiit pillugit nittarsaassinermi Sermersuup peqataanerata nalinginnaasumik atorfinitsitsinissap saniatigut siunertaa tassaavoq, piukkunnaatillit Nunatsinnut atassuteqartut amerlanerusut Danmarkimi najugaqartut Nunatsinni suliffissarsiulernissaat suliffimmillu misiliinissaat anguniassallugu. Tamatuma peqataanik Kommuneqarfik Sermersooq suliffeqarfittut suliffimmillu misiliiffissatut kiisalu immikkut ittumik allaaserinninnermi suleqatigiinnissamut aasaaneranilu suliffigisassatut periarfissaasoq saqqummiutissallugu siunertaavoq.
Siunissami periarfissatsialaat
Kommuneqarfik Sermersuumit aallartitat tassaapput Ida-Marie Rasmussen, Magnus Biilmann Trolle aamma Tanja Knudsen. Ida-Marie Rasmussen aamma Magnus Biilmann Trolle aasaanerani suliffeqartuunikuupput, maannalu kommunimi siulleq siunnersortaavoq aappaalu AC-fuldmægtigiulluni.
”Piukkunnaateqarluartorpassuit kiisalu ilinniartut angusaqarusussuseqarluartuusut oqaloqatigaavut, qularinngilluinnarpaallu suna piumanerlugu sorusunnerlutillu. Kommuneqarfik Sermersooq siunissami suliffissatut, aasaanerani suliffittut, suliffimmik misiliiffissatut imaluunniit immikkut ittumik allaaserinninnermi suleqatigiiffigisassatut soqutiginnilersipparput”, Kommuneqarfik Sermersuumi ineriartortitsinermut siunnersorti Tanja Knudsen taama oqarpoq.
Kommuneqarfik Sermersooq sulisunik nutaanik atorfinitsitsinermik, suliffimmik misiliisussanik piginnaasaqarluartunik pissarsinermik aamma aasaanerani sulisussanik Danmarkimi ilinniagaqaqqinnermik ingerlataqartunik kiisalu immikkut ittumik allaaserinninnermi suleqatigiinnissanik arlalinnik pissarsinissamik misilittagaqarluarpoq.