Kommuneqarfik Sermersuumi politikerit Nuummi Tasiilamilu atuartut angerlarsimaffii pillugit immikkoortumut pilersaarut nutaaq akuersissutigeqqammerpaat. Pilersaarut annertooq pineqarpoq, tassani suliniuterpassuit ataatsimut qulakkiissavaat atuartut angerlarsimaffiisa annerusumik meeqqat atuarfianni atuartunit angerlarsimaffittut misigineqarnissaat.
”Assorsuaq nuannaarutigivara, Nuummi Tasiilamilu atuartut angerlarsimaffiutitsinnut immikkoortumut pilersaarut kommunalbestyrelsimit tapersersorneqarmat. Suliami sivisuumik ingerlasimasumi alloriarneq siulliuvoq, aqqutaani atuartunut atugassat pitsanngorsarneqartuarsimapput, taakkuuppummi uani pineqartut. Neriuppunga siunissami atuartunut angerlarsimaffiit angerlarsimaffivittut iliumaartut “suliffeqarfippalaannginnerullunilu”, Meeqqanut Atuarfeqarnermullu Ataatsimiititami siulittaasoq Juaaka Lyberth oqarpoq.
Immikkoortumut pilersaarut annertuumik atuartunut angerlarsimaffinni perorsaanikkut pingaartitanik suliaqarnissamik ilaqarpoq, aammali suliniuterpassuit aalajangersimasut inissinneqareerput.
Allannguinissamut piffissaqarnerunissaq
Atuartut atuartunut angerlarsimaffimmut nuuttarnerat imaannaaneq ajorpoq, ulluinnaat imaaliallaannaq atuartumut ilaqutaasunullu allanngortarmata, ajornartorsiullu tamannarpiaavoq immikkoortumut pilersaarummi qaangerniarneqartoq. Piareersarnerit inuusuttup atuartunut angerlarsimaffimmut nuunnginnerani aallartereertarput, kommunimi sulisumit sapinngisamik ilaqutariit angerlarsimaffianni toqqissisimanartumi pulaarneqartarnerisigut.
Piareersarnerup toqqissisimanartumik tunngaveqarnissaa kommunimit pingaartutut isigineqarpoq, inuusuttunummi taama inuusutsigaluni ilaquttaniit aallarneq qularutissaanngitsumik artornartuusinnaavoq.
Ataatsimut angusaqarniarluni suliniuterpassuit
Angerlarsimaffik aamma angerlarsimasutut misigisimaneq assigiinngitsorpassuarnik imaqarpoq. Tamanna immikkoortumut pilersaarusiornermi Meeqqanut Atuarfeqarnermullu Ingerlatsivimmit assut eqqumaffigineqarsimavoq. Taamaattumik pingaartillugit suliassaqarfiit arlallit assigiinngitsut pingaartinneqartussat aamma suliniutinik aalajangersimasunik suli amerlanerusunik, taakkunanngalu ilai aallartereersimasunik, imaqarpoq.
Tassani ilaatigut assersuutigalugu siunnersorteqarnermik (mentor) aaqqissuussineq pineqarpoq, taanna massakkut misiliummik Nuummi ingerlanneqarpoq. Taanna pilersinneqarpoq atuartut inersimasunut attaveqarluarnissaat qulakkeerumallugu, ilaasa angajoqqaamik angajoqqaatulluunniit oqartussaassusillit ungasikkaangata maqaasisartagaat. Misileraaneq naammassippat misilittakkat tunngavigalugit nalilersuisoqassaaq, aaqqissuussinerup atuartunut angerlarsimaffinni arlariinni ataavartumik atulersinnginnerani.
Suliniut alla aallartinneqareersoq tassaavoq, atuartunut angerlarsimaffinni sulisut ilitsersorneqartarnerat. Kingornatigut sulisut atuartut ilinniagassaminnik suliaqarneranni ikiuussinnaanerminnut aamma piareersarneqalissapput.
Tamakkua saniatigut aamma atuartunut angerlarsimaffiit illutamikkut qanoq ittuuneri misissorneqassapput. Tassami qanoq ittuuneri aamma angerlarsimasutut misiginissamut atugarissaarnissamullu apeqqutaalluinnartarmata. ”Atuartut angerlarsimaffii angerlarsimaffiussapput – kollegiaanani”, Lone Nukaaraq Møller erseqqissaavoq.
Immikkoortumut pilersaarut suliniuterpassuarnik imaqarpoq, tamakkerlugulu atuarneqarsinnaavoq uani