Services

Sunngiffimmi atuartitsinermut programmi piareerpoq – maanna peqataanissamut nalunaarit!

2021/2022-mi sunngiffimmi atuartitsinermut programmi Peqqinnermut Sunngiffimmilu Immikkoortortaqarfiup naammassivaa. Kikkunnut tamanut qassinilluunniit ukiulinnut sammisassat nuannersorpassuit soqutiginartullu periarfissaapput, taamaattumik programmi misissoriarlugu peqataanissamut ullumikkut nalunaarit.

Meeqqanut programmimiipput assersuutigalugit iganeq, mersorneq iffiornerlu, tamatuma saniatigut meeqqanut inuusuttunullu immikkut pisariaqartitsisunut allat peqatigalugit sammisassaqarpoq.

Inersimasut ilaatigut avittarnermut, marriornermut tunngatillugu pikkorissarsinnaapput sunngiffimmilu angallatilinnut imarsiornermut uppernarsaatitaartoqarsinnaavoq. Taakku periarfissarpassuit ilagiinnarpaat.

Programmi uani takusinnaavat peqataanissamullu nalunaarlutit.

Sammisassat Nuummi sumiiffinni assigiinngitsuni ingerlanneqassapput, siulliillu sapaatip-akunnera 42-mi aallartissapput.

Peqataaniarlutit nittartakkakkut nalunaarnissamik periarfissaqanngilatit? Sukkulluunniit peqataaniarlutit nalunaarsinnaavutit imaluunniit paasissutissat annertunerusunik pissarsisinnaavutit ugguuna, oqarasuaat 36 60 81 imaluunniit mailikkut sunngiffik@sermersooq.gl