Services

Nuummi qimminik aneerussisarfik

Qimminik aneerussisarfik Qinngutsinni, Sanap avataani kangerliumanermi allamiluunniit inissisimatinneqassava?

Nuummi qimminik aneerussisarfeqalernissaq Sanarfinermut Avatangiisinullu Ingerlatsivimmit suliaralugu nangeqqinneqarpoq sumilu inissisimasinnaanersoq periarfissarsiussalluni.

Qimminik aneerussisarfissap inissisimaffissaatut siunnersuut kommunip innuttaasunik peqataatitsinermut nittartagaatigut, Kommuneqarfiga aqqutigalugu tamanut tusarniaassutigineqarpoq. Tusarniaanermi akissutit tallimat tiguneqarput, taakkunanngalu marluk inissisimaffimmik isumaqataanatik.

Borgmester Charlotte Ludvigsen: ”Kommuneqarfiga innuttaasunit atorneqarluartoq assut nuannerpoq. Kommunitta ineriartortinneqarnerani innuttaasut peqataatinneqartarnissaat namminneerlutillu peqataasarnissaat siunertariuarnikuuarput. Innuttaasut oqaloqatigisarnissaat qanorlu isumaqarnersut tusaasarnissaat pingaaruteqarpoq”.

Qimminik aneerussisarfissaq Unaami kollegiat ungasinngisaanni nunatarujussuarmi kuunnguarpassualimmiittaaq inissisimassasoq siunnersuutaanikuugaluarpoq. Maanna inissisimaffissamik allamik ingerlatsivik periarfissarsiussaaq.

Qinngutsinni inissisimaffissatut toqqarneqartoq nuannaralugu innuttaasoq ima allappoq: ”Inissisimaffissatut toqqarneqartoq pitsaasuuvoq. Qimminik uumasuutillit maannakkut biilerlutik naapittarfiata ungasinngisaani biilinut unittarfiup tungaanut aqqut takivallaanngilaq. Aamma Qinngutsinni kuummi illuatungeriinni najugallit pisullutik orneriaannaavaat. Qimmit aneertarfissaata aaqqissuunnissaa pilersaarutigineqarpat ungalut portusuut, issiaviit, eqqaaviit ilanngunneqartariaqarput kiisalu ajornanngippat qimminut unamminartumik pinnguarfissaat nukersorfigisinnaasaat ilanngullugu eqqarsaatigalugu”, innuttaasoq taama allappoq.

Innuttaasoq naammaginninngitsoq ima allappoq: “Inissisimaffissatut toqqarneqartoq pitsaanngilluinnarpoq. Unaami najugaqartutut sumiiffik aasaanerani ukiuuneranilu ilaqutariinnit meerartalinnit atorluarneqartarpoq. Ilaqutariit meerartallit najugaqarfiisa imaluunniit najugaqarfiit eqiteruffiusut eqqaaniunngitsoq sumiiffimmik toqqaaniaritsi”, innuttaasoq taama allappoq.

Qimminik aneerussissarfeqalernissamut siunertaasoq tassaavoq, illoqarfimmi qimmerineqartut ungaluliap iluani piumasaminnik pitinneqarsinnaallutik. Qimmit nakkutigineqaratik qimaannarneqartassanngillat qimmillu anai qimminik piginnittunit katersorneqartassapput.